Ամերիկայի հայկական համագումարը շնորհավորում է Արցախի անկախության 25-ամյակը
Վաշինգտոն. Ամերիկայի հայկական համագումարը (Համագումար) շնորհավորանքներն է հղում Լեռնային Ղարաբաղի Հանրապետությանը (ԼՂՀ) 25-ամյա անկախության առիթով: 1991թ-ի սեպտեմբերի
2-ին Լեռնային Ղարաբաղի ինքնավար մարզի օրենսդիր մարմինն ու հարակից Շահումյանի շրջանը հռչակեցին ԼՂՀ-ի կազմավորման մասին, ի չիք դարձնելով հայոց հինավուրց Արցախ նահանգը նորաստեղծ խորհրդային Ադրբեջանի կազմում ընդգրկելու Ստալինի 1921թ-ի ինքնակամ որոշումը:
Նկարում. Ամերիկայի հայկական համագումարին տրված Լեռնային Ղարաբաղի Հանրապետության Երախտագիտություն մեդալը և հավաստագիրը:
Կարդացեք նաև
«Լեռնային Ղարաբաղի Հանրապետության անկախության 25-ամյա տարելիցի կապակցությամբ Ամերիկայի հայկական համագումարի անունից սրտագին շնորհավորանքներ ենք հղում Արցախի ողջ ժողովրդին», – Բակո Սահակյանին հղված համատեղ նամակում հայտարարեցին Համագումարի հոգաբարձուների խորհրդի համանախագահներ Էնթոնի Բարսամյանն ու Վան Գրիգորյանը և Համագումարի նախագահ Քերոլին Մուգարը: «Հայերիս ժամանակակից կյանքում Լեռնային Ղարաբաղը մարմնավորում է թե՛ կորուստներ, թե՛ հաղթանակներ, որոնք համարում ենք մեր ազգի լավագույն բնութագրերը, և որոնք իսկապե՛ս ստեղծում են կուռ ընտանեկան կապեր: Քաջությունը, հաստատակամությունը, ազնվությունը, ժողովրդավարությունը, տոկունությունը, բարի կամքը, հավատն ու հարգանքը, որոնք Արցախի ժողովուրդը դրսևորեց անկախության պայքարի սկզբից ի վեր, շատ ոգեշնչող էին, և պատիվ ենք ունեցել ի սկզբանե աջակցել սեփական ապագան որոշելու Ձեր իրավունքին»:
1991 թվականին անկախության հռչակումից ի վեր, ԼՂՀ-ն իր ազատությունը պաշտպանել է ռազմի դաշտում, և կենսունակ քաղաքացիական հասարակության պայմաններում վարել կայուն ժողովրդավարություն և զարգացրել շուկայական տնտեսություն: Ի հեճուկս Ադրբեջանի նորանոր ոտնձգությունների շարունակվող սպառնալիքների, Արցախը շարունակում է հավատարիմ մնալ մարդու իրավունքների և քաղաքացիական ազատությունների համամարդկային արժեքներին, որպես ինքնիշխան ժողովրդավար երկիր և միջազգային հանրության հուսալի անդամ:
«Միջազգային պայմանագրերի և բարեխղճության ցանկացած չափանիշի հստակ խախտում հանդիսացող Ադրբեջանի նախագահ Ալիևի և մյուսների իրագործած վերջին վայրագություններն ու հարձակումները մեր դիմակայած ռիսկերի անընդհատ հիշեցումներն են: Հայկական համագումարը շարունակում է քարոզչությունն ի նպաստ Ձեր ազատության ու անվտանգության», – ասացին Բարսամյանը, Գրիգորյանն ու Մուգարը Արցախի Նախագահին: «Տևական լուծում չի կարող լինել, քանի դեռ Արցախի կառավարությունը չմասնակցի ԵԱՀԿ Մինսկի խմբի բանակցային գործընթացին, և Արցախի ժողովուրդը ժողովրդավարորեն չհաստատի ցանկացած բանակցային լուծում», – հավելեցին նրանք:
1997 թվականից ի վեր, Համագումարը Վաշինգտոնի իր գրասենյակում հյուրընկալել և տեղակայել է ԱՄՆ-ում Լեռնային Ղարաբաղի Հանրապետության գրասենյակը: Կազմակերպությունը կշարունակի ջանքերն ի նպաստ Հանրապետության բարգավաճմանն ու նրա ժողովրդավարական կառավարմանը:
Ի գնահատանք Համագումարի ջանքերի, Նախագահ Սահակյանը պարգևատրեց կազմակերպությանը Արցախի Երախտագիտություն շքանշանով՝ «ԼՂՀ-ի տնտեսության, գիտության, մշակույթի, սոցիալական ոլորտների զարգացման ու վերականգնման գործում նշանակալի ավանդի, ինչպես նաև Հանրապետության միջազգային ճանաչման պաշտպանության և խթանման» համար:
«Հայկական համագումարի անունից Արցախի Երախտագիտություն մեդալն ընդունելը մեծ պատիվ է: Մեծագույն պատիվ է նաև նման արժանավոր մարդկանց կողքին այսօր գտնվելը: Երախտապարտ եմ զինվորների ու զինված ուժերի ներկայացուցիչների կողքին գտնվելուս համար, ովքեր միավորեցին աշխարհասփյուռ հայերին և իսկապե՛ս տեր են կանգնում Արցախին», – ասաց Համագումարի տարածաշրջանային տնօրեն Արփի Վարդանյանը: «Շնորհավորում ենք Լեռնային Ղարաբաղի Հանրապետությանը քառորդ դարյա հաջող պետականաշինության և ժողովրդավարությանը Ձեր անսահման նվիրվածության առիթով: Համագումարը շարունակելու է լինել Արցախի կողքին և աջակցել նրան ապագայում ևս»:
