Այսօր ԱՄՆ-ի մայրաքաղաք Վաշինգտոնում քննարկում է տեղի ունեցել՝ Հայաստանում ժողովրդավարացման զարգացման ու ներքաղաքական իրավիճակին նվիրված: Այն կազմակերպվել էր «Policy forum Armenia»-ի կողմից
Հնչած հարցին, թե ի՞նչ է անում պաշտոնական Վաշինգտոնը, որ կանգնեցնի ՌԴ-ի ճնշումները ՀՀ-ի վրա, դեսպան Ջոն Հերբսթը պատասխանեց.
«Արեւմուտքը, այդ թվում ԱՄՆ-ն դանդաղ է արձագանքում Պուտինի կողմից վտանգին, բայց նույնիսկ այժմ Արեւմուտքը դեռեւս չի հասկանում՝ ինչպես կարող է հակազդել ՌԴ ռազմատենչ քայլերին, այն պետությունների նկատմամբ, որոնք ՆԱՏՕ-ի անդամ չեն»:
Հայաստանի հարցերով փորձագետ Էնդրյու Նովյուն էլ շարունակեց՝ ասելով, որ ԱՄՆ- ՌԴ, Արևմուտք- ՌԴ հարաբերությունները հիմնականում կենտրոնացել են ՆԱՏՕ-ի անդամ պետությունների անվտանգության վրա, բայց, կարծես թե, ՌԴ-ն ավելի մեծ հնարավորություններ ունի ճնշումներ գործադրել ՆԱՏՕ-ի անդամ չհանդիսացող պետությունների վրա՝ Վրաստանի, Հայաստանի անկախության դեմ քայլեր ձեռնարկել. «Այս դեպքում պարզ չէ՝ ինչպես արձագանքի Արեւմուտքը, որովհետեւ, ի տարբերություն ՆԱՏՕ-ի անդամ պետությունների, չկան համաձայնագրեր ՆԱՏՕ-ի ոչ անդամ պետությունների հետ, իսկ ՌԴ-ն ՀՀ-ին վերաբերում է որպես իր կայսրության մի մաս, ինչպես դա ընթացքում եղել է»:
Պարոն Նովյուի խոսքով, ճիշտ է՝ տարածաշրջանում ՀՀ-ն Վրաստանի հետ նորմալ հարաբերություններ ունի, բայց Թուրքիայի ու Ադրբեջանի հետ լուրջ խնդիրներ ունի: Ըստ նրա, ՀՀ կառավարությունը պետք է հասկանա, որ ունենալով նման խնդիրներ, հնարավոր չէ տարածաշրջանում լուրջ դեր ունենալ:
«Ռենդ» կորպորացիայի փորձագետ Սթիվեն Լարըբին էլ նկատեց, որ Թուրքիան կարող է շատ ավելի հեշտությամբ դիմակայել Ադրբեջանի ճնշումներին ու համաձայնել ՀՀ հետ բարելավել հարաբերությունները, եթե ԼՂ հիմնահարցի կարգավորում լինի:
Արփինե ՍԻՄՈՆՅԱՆ
