Կենտրոն և Նորք-Մարաշ վարչական շրջանների ընդհանուր իրավասության դատարանը մեկ ժամ ժամանակ տվեց նախորդ տարվա նոյեմբերի 25-ին Նորք-Մարաշում վնասազերծված հանցավոր խմբի գործից «անջատված մասով» հարուցված քրգործով մեղադրյալներին վերջին խոսքին պատրաստվելու համար:
Այսօր այս գործով բոլոր ամբաստանյալները դատարանին հայտնեցին, որ պատրաստ չեն վերջին խոսքին:
Ամբաստանյալներից երկուսի՝ Անուշավան Ավետիսյանի եւ Հակոբ Հակոբյանի պաշտպանները ներկայացան նաեւ վերջին ճառով:
Ավետիսյանի պաշտպան Սիրանուշ Հարությունյանի խոսքով, նախաքննության ընթացքում իր պաշտպանյալը խոստովանական ցուցմունք է տվել, զղջացել իր արածի համար, նա աջակցել է քննությանը:
Կարդացեք նաև
Ըստ նրա, իր պաշտպանյալի նկատմամբ առաջադրվել է մեղադրանք քրեական օրենսգրքի 235 հոդվածի երկրորդ մասով, որը նախատեսում է 2-6 տարվա ազատազրկում, բայց. «Իմ պաշտպանյալը ակտիվ աջակցել ու նպաստել է հանցագործության բացահայտմանը, նրա նկատմամբ պետք է կիրառվի ավելի մեղմ պատիժ, սահմանվածից մեղմ»: Նա առաջարկեց կիրառել Քրեական օրենսգրքի 64 hոդվածը:
Նա ընդգծեց, որ Ավետիսյանը երրորդ կարգի հաշմանդամ է, բազմանդամ ընտանիքի ղեկավար, թոշակառու:
Հակոբ Հակոբյանի պաշտպանն էլ ներկայացրեց Հակոբյանի անձնական ու առողջական խնդիրների վերաբերյալ փաստաթղթերը:
Փաստաբանի խոսքով, իր պաշտպանյալը ռազմամթերքի ու պայթուցիկների զգալի մասի ձեռքբերմանն ընդհանրապես չի մասնակցել: Ըստ նրա, Եթե Հակոբյանը չի նախաձեռնել այդ իրերի ձեռքբերմանն ու իրացմանը, պատիժը ծանրացնող հանգամանքներ չկան: Փաստաբանը նաեւ հիշեցրեց, որ նախաքննության ժամանակ էլ իր պաշտպանյալը խոստովանական ցուցմունք է տվել, աջակցել նախաքննական մարմնին հանցագործության բացահայտմանը.
«Երբեւէ չի փորձել հայտնել իրականությանը չհամապատասխանող տեղեկություններ, զղջացել է կատարած արարքի համար:
Բնութագրվում է դրական, ամուսնացած է, ունի երկու երեխա, որից մեկն անչափահաս է: Ավագ որդին ԶՈՒ զինծառայող է, սոցիալապես անապահով է ու բացի իրենից ընտանիքը խնամող չկա»:
Արփինե ՍԻՄՈՆՅԱՆ
