Լրահոս
Օրվա լրահոսը

«Այրված, ծեծված ու խաբված». Սարի թաղի եւ Խորենացու դեպքերի մասին զեկույց հրապարակվեց

Սեպտեմբեր 08,2016 12:41

2016թ. հուլիսի 17-30-ը տեղի ունեցած իրադարձությունների մոնիտորինգի արդյունքում՝ Միջազգային Համագործակցությունը, Հանուն Մարդու Իրավունքների կազմակերպությունը և Հելսինկյան Ասոցիացիա իրավապաշտպան կազմակերպությունը, համագործակցելով Նորվեգիայի Հելսինկյան Կոմիտեի, Protection of Rights without Borders կազմակերպության եւ Հելսինկյան քաղաքացիական Ասամբլեայի Վանաձորի ներկայացուցչության հետ զեկույց է կազմել: Այն կոչվում է՝ «Այրված, ծեծված ու խաբված» եւ այն նվիրված է իրավապաշտպան Միքայել Դանիելյանի հիշատակին:

img_7502Այսօր զեկույցը ներկայացնելիս Նորվեգյան Հելսինկյան Կոմիտեի ավագ խորհրդական Լենե Վեթլանդն իր զարմանքը հայտնեց այդ իրադարձությունների վերաբերյալ. «Ես զարմացած եմ ՀՀ իշխանությունների վերաբերմունքից: Մենք իշխանությունների վերաբերմունքը տեսանք 2008-ի Մարտի 1-ին եւ Էլեկտրիկ Երեւանի իրադարձությունների ժամանակ: Այս տարվա հուլիս ամիսը եւս բացառություն չէր: Մարդու մի քանի հիմնարար իրավունքներ են խախտվել, խախտվել են ոչ միայն ներպետական, այլեւ միջազգային նորմերը՝ Մարդու իրավունքների եվրոպական կոնվենցիան, Քաղաքական եւ քաղաքացիական իրավունքների միջազգային դաշնագիրը: Խախտվել են խաղաղ ցույցեր անցկացնելու, ազատ արտահայտվելու իրավունքները, ոչ մարդկային վերաբերմունք եւ հալածանք է եղել: ՀՀ իշխանությունները չպետք է այդպիսի վերաբերմունք ցույց տային Սարի թաղում ցուցարարների նկատմամբ: Եթե անգամ ՀՀ ներպետական օրենքը չի նախատեսում նմանատիպ ցույցերի իրականացում, համարում է անօրինական, իրավունք չունեին նման կերպ արձագանքել: Առավել եւս՝ խաղաղ բնակիչների հանդեպ: Պետք է խոսել օրենքի անհամապատասխանությունից: Ոստիկանները ներխուժել են մարդկանց տներ, ծեծի ենթարկել եւ ոչ մարդկային վերաբերմունք դրսեւորել: Կալանավորելու ընթացքում է ուժ է գործադրել, ձերբակալելուց հետո չի տրամադրել իրավաբանական օգնություն»:

artur_saqunc_3Միջազգային Համագործակցությունը Հանուն Մարդու Իրավունքների կազմակերպության կոորդինատոր Սվետլանա Վալկոն ասաց, որ իրենց մոնիտորինգի խմբի անդամները այցելել են հիվանդանոց, զրուցել տուժածների հետ: Նա ներկայացրեց զեկույցում տեղ գտած մի քանի մեջբերումներ՝ ցուցարարների խոսքերից. «Մաշկի 16 տոկոսը, այդ թվում՝ դեմքը այրած Թամար Մանուկյանը պատմել է՝ նռնակները սուլոցով վեր էին թռնում պարուրաձեւ հետագծով ու հետո ընկնում: Մեկն ընկավ իմ ոտքին, մինչեւ հասկացա, որ ինձ է կպել, արդեն բոցերի մեջ էի: Երբ պայթյունը լսեցի, կարծեցի՝ կփախնեմ, բայց արդեն բոցերի մեջ էի ու չէի կարող շարժվել»:

Անի Հարությունյանն էլ, որը ցույցի է գնացել քրոջ եւ մորաքրոջ հետ, պատմել է, թե ինչպես է խլացել. «Ես խլացել էի, բան չէի լսում, ոտքս վիրավոր էր, ծուխ էր ամեն տեղ ու դժվար էր հասկանալ, թե ուր պետք է գնալ: Մենք վազում էինք՝ ոստիկանները մեր հետեւից»:

Զեկույցում նաեւ տեղ են գտել Սարի թաղի բնակիչների նկատմամբ բռնությունները, թե ինչպես են մտել տները եւ ահաբեկել, երեխաների ներկայությամբ ինչպես են ոստիկանները հորը ծեծել նրանց աչքի առաջ. «Մի երեխա այնքան է վախեցել ու այնքան խորն է թաքնվել, որ չէին կարողանում գտնել»:

Հռիփսիմե ՋԵԲԵՋՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Սեպտեմբեր 2016
Երկ Երե Չոր Հնգ Ուրբ Շաբ Կիր
« Օգո   Հոկ »
 1234
567891011
12131415161718
19202122232425
2627282930