«Գեղեցիկ հրաշալի մտքեր է արտահայտում, միջազգային գործընկերների հետ իբրեւ թե հրաշալի աշխատող է, բայց նա համակարգի ներկայացուցիչ էր»,-ՀՀ վարչապետի թեկնածու Կարեն Կարապետյանի մասին այսպես արտահայտվեց «Ժառանգություն» կուսակցության փոխնախագահ Արմեն Մարտիրոսյանը` այսօր Ազատության հրապարակում «Սասնա ծռեր» շարժման հավաքի ժամանակ:
Անդրադառնալով Հովիկ Աբրահամյանին` նա ասաց. «Իր նման որեւէ մեկը չի կարող ընտրակեղծարարություն կազմակերպել: Դա իսկապես վարպետության աստիճան է»:
Մարտիրոսյանը հիշեցրեց, որ Կարեն Կարապետյանը տարիներ շարունակ գլխավորել է «Հայռուսգազարդը». «Այն հայ ժողովրդից կթեց մեծածավալ գումար` օրինական եւ անօրինական: Գյուղերում գազ քաշելու համար որքան «լեվի» գումար էին տալիս, այդ գումարներն ո՞ւր էին գնում: Գազալցակայանների հետ կապված բազմաթիվ խնդիրներ առաջացան: Այդ «լեվի» գազն ինչպե՞ս էր մտնում գազալցակայաններ: Հատկապես ձմռանը գազի որակի խնդիրներ են լինում, իսկ ԽՍՀՄ ժամանակ գազի կալորիականության խնդիր չկար»:
Արմեն Մարտիրոսյանը հարցադրում արեց` երբ Կարեն Կարապետյանը Երեւանի քաղաքապետի պաշտոնում էր, ի՞նչ փոփոխություններ եղան. «Միայն որոշ հատվածներից փողոցային առեւտուր անողներին հանեցին, թույլ չտվեցին օրվա հաց վաստակել, եւ որոշ կրպակներ հանեցին: Մի քանի ընտանիք այդպես թողեցին Հայաստանից գնացին»:
Կարդացեք նաև
Հավելենք, որ հավաքի ավարտին Ազատության հրապարակից մեկնարկեց «Սասնա ծռեր» շարժման երթը: Մասնակիցները կանցնեն կենտրոնական փողոցներով, ապա կվերադառնան Ազատության հրապարակ:
Լուիզա ՍՈՒՔԻԱՍՅԱՆ