«Երևանյան հեռանկարներ» 17-րդ միջազգային երաժշտական փառատոնի շրջանակում սեպտեմբերի 14-ին «Արամ Խաչատրյան» համերգասրահում կայացավ էստոնական հանրահայտ «Հորտուս Մուզիկուս» խմբի համերգը:
Ինչպես նշեց գեղարվեստական ղեկավար, դիրիժոր եւ բացառիկ ջութակահար Անդրես Մուստոնենը, օրն իր համար առանձնահատուկ է, քանի որ ինքը պարգեւատրվել է ՀՀ մշակույթի նախարարության Ոսկե մեդալով: Ճանաչված երաժիշտը հայտնեց, որ տարբեր տարիների Հայաստանում հանդես է եկել 25-30 անգամ, եւ կատակով էլ հավելեց, թե 1000 անգամ էլ դեռ ելույթ կունենա:
«Հայաստանն ասես իմ տունը լինի»,-ոգեւորված ասաց Անդրես Մուստոնենը: Համերգի ծրագրում շողացող վերածնունդ էր ու փայլուն բարոկկո: «Հորտուս Մուզիկուսի» փառահեղ համերգը իսկապես բոցավառեց դահլիճը, ու միախառնվեցին ունկնդրի ջերմությունն ու բեմից եկող հզոր էներգիան ու ոգեւորությունը: Բրավոների պակաս, բնականաբար չեղավ:
«Հորտուս մուզիկուսը» սեպտեմբերի 15-ին էլ ելույթ կունենա Բյուրականի արվեստի ակադեմիայում` բոլորովին այլ ծրագրով: Բյուրականում կհնչեն հրեական երգեր, ավանդական երաժշտություն, հատվածներ` «Կարմինա Բուրանա» ձեռագրերի շարքից:
Գոհար ՀԱԿՈԲՅԱՆ
