Հոկտեմբերի 2-ին Սիսիանում սպասվող ՏԻՄ ընտրություններին ընդառաջ Սիսիանում առաջադրված քաղաքապետի և ավագանու թեկնածուները բարձրաձայնում են քաղաքում գոյություն ունեցող խնդիրների մասին:
«Մեդիա կենտրոնի» և Գորիսի մամուլի ակումբի համատեղ կազմակերպված քննարկմանը «Լուսավոր Հայաստան» կուսակցությունից առաջադրված Սիսիանի քաղաքապետի թեկնածու Սրբուհի Գրիգորյանն առանձնացրեց քաղաքի Ֆիզկուլտուրնիկների թիվ 6 վթարային շենքի խնդիրը, որտեղ վտանգավոր պայմաններում ապրում են մոտ 40 բնակիչներ. «Այս խնդրով անհապաղ պիտի զբաղվել: Հրատապ է նաև ճանապարհների վերանորոգման հարցը, թե չէ դեպքեր են եղել, երբ մարդիկ վատ ճանապարհների պատճառով ընկել ոտք են կոտրել: Խաղահրապարակների խնդիրը ևս մեզ համար գերակա է, որ մեր երեխաները Երևան չգնան Լունապարկում կարուսել նստելու համար»:
Սիսիանի քաղաքապետի առաջադրված թեկնածու, Սիսիանի գործող քաղաքապետ Աղասի Հակոբջանյանի համար ևս մտահոգիչ է խաղահրապարակների խնդիրը. «Նախքան իմ` քաղաքապետ ընտրվելն այդ խաղահրապարակներում սնկի պես սկսել են աճել ավտոտնակները»: Դառնալով իր ստացած ժառանգությանը` գործող քաղաքապետն ասաց. «Իբրև ժառանգություն ստացել եմ մեկ կնիք, մեկ աղբատար մեքենա` օգտագործված և վարձակալվող քաղաքապետարանի շենք, բայց կարողացել ենք մեր սուղ միջոցներով ձեռք բերել բավականին տեխնիկա, որը քաղաքը սպասարկում է աղբահանության և սանմաքրման խնդիրներում»:
Հարցին` ինչպե՞ս են պայքարելու ընտրակեղծիքների դեմ, «Լուսավոր Հայաստան» կուսակցության թեկնածու Սրբուհի Գրիգորյանը պատասխանեց. «Կաշխատենք հրապարակային դարձնել բոլոր խախտումները: Նա, ով կփորձի ոտնահարել մյուսի իրավունքները, պատասխանատվության կենթարկվի դատական կարգով: Մեկ, երկու, երեք մարդ գոնե պետք է պատասխանատվության ենթարկվի, որ մյուսները զգաստանան: Կոշտ է մեր դիրքորոշումը. մենք գնում ենք արդարությամբ, նույնն էլ պահանջում ենք մյուս թեկնածուներից: Եթե որևէ մեկը փորձի ընտրական, ճնշումների ձևով մտնել ընտրություններ, պատժվելու է»:
Կարդացեք նաև
Տաթև ՀԱՐՈՒԹՅՈՒՆՅԱՆ
