Սեպտեմբերի 19-ին Նոյեմբերյան քաղաքում տեղակայված Տավուշի մարզի թիվ 40 ընտրատարածքային ընտրական հանձնաժողով էին եկել Իջեւանի տարածաշրջանի Լուսաձոր համայնքի ղեկավար Սուրեն Քոչարյանը եւ վերջինիս վստահված անձը:
Նրանք ԸԸՀ-ին բողոքեցին, որ սեպտեմբերի 18-ին Լուսաձոր համայնքի ղեկավարի ընտրությունների ժամանակ ընտրողներին տրվել են անհետացող թանաքով գրիչներ: Ընտրողներն այդ գրիչներով քվեարկելուց հետո թանաքը ցնդել է,քվեաթերթիկի վրա մնացել է միայն նշման տեղում գրչի արած մակերեսային փորագրումը:
Լուսաձորի գյուղապետ Սուրեն Քոչարյանը հայտնեց, որ նման 60 քվեաթերթիկ է եղել, տեղամասային ընտրական հանձնաժողովը դրանցից 36-ը համարել է Լուսաձոր համայնքի ղեկավարի թեկնածու Վարդան Սարդարյանի ,2-ը՝ այլ թեկնածու Սուրեն Քոչարյանի օգտին: Ս. Քոչարյանը թիվ 40 ԸԸՀ-ին ուղղած դիմումում պահանջել է կատարել քվեաթերթիկների վերահաշվարկ: Քվեաթերթիկների վերահաշվարկ է պահանջել նաեւ Ազատամուտ համայնքի ղեկավարի թեկնածու Արտեմ Սարիբեկյանը:
Սեպտեմբերի 18-ին կայացած ընտրությունների քվեաթերթիկների վերահաշվարկ է պահանջել նաեւ Այրում համայնքի ղեկավարի թեկնածու, անկուսակցական փաստաբան Դավիթ Փարսադանյանը: Նա պահանջել է, որ քվեաթերթիկների վերահաշվարկ կատարվի Դեբեդավան, Պտղավան եւ Դեղձավան գյուղերի ընտրական տեղամասերում: Թիվ 40 ԸԸՀ նախագահ Գագիկ Աբովյանը հայտնեց, որ ընտրատարածքային ընտրական հանձնաժողովը բոլոր 3 դիմումները բավարարվել է , սեպտեմբերի 20-ին նշված ընտրական տեղամասերում վերահաշվարկ կկատարվի:
Կարդացեք նաև
Ոսկան ՍԱՐԳՍՅԱՆ
