«Գյումրիում տեղի ունեցած ողբերգությունը գաղջ մթնոլորտի հետեւանք է` համընդհանուր գաղջություն եւ կրիմինալի նոր շարժ»,-Գյումրիի ՏԻՄ ընտրություններում ԲՀԿ-ի ցուցակը գլխավորող Վարդեւան Գրիգորյանի որդու մահվան դեպքն այսպես է բնութագրում ԱԱԾ պետի նախկին տեղակալ Գուրգեն Եղիազարյանը:
Այսօր «Հայելի» մամուլի ակումբում նա անդրադարձավ նաեւ Էջմիածնի դեպքին: Հիշեցնենք, որ օրեր առաջ կրակել էին ԱԺ ՀՀԿ խմբակցության պատգամավոր, գեներալ Մանվել Գրիգորյանի որդու` Էջմիածնի քաղաքապետ Կարեն Գրիգորյանի մեքենայի ուղղությամբ: Ըստ տեղեկությունների` Կարեն Գրիգորյանի և Արթուր Թումանյանի թիմակիցների միջև դեպքից հետո բախում է տեղի է ունեցել:
«Էջմիածինը փորձաքար է, թե հասարակությունն ուր է գնում: Ի վերջո, նախաքննությունը պաշտպանելո՞ւ է արդարի շահը, թե ոչ: Սա կձգվի այնքան, մինչեւ մոռանանք սրա մասին: Ամոթ է` զզվեցինք: Սուրբ քաղաքում պարբերաբար ծեծ ու ջարդ են կազմակերպում, հետո խոսում արդարությունից»,-նկատեց Գուրգեն Եղիազարյանը:
Էջմիածնի դեպքի առթիվ «Ազգային անվտանգություն» կուսակցության նախագահ Գառնիկ Իսագուլյանն իր հերթին ասաց, որ մեղավոր է նաեւ Էջմիածնի ժողովուրդը. «Եթե ընտրությունների հետ է կապված, խստագույնս պետք է պատժվի: Եթե Մանվել Գրիգորյանը մեղավոր է, խստագույնս պետք է պատժվի: Բայց նախեւառաջ ժողովուրդը պետք է պատրաստ լինի իր իրավունքների համար պայքարելու»:
Կարդացեք նաև
Լուիզա ՍՈՒՔԻԱՍՅԱՆ
