Aravot.am-ը Հանրայինի աղմուկ հանած «Ամենակարող երգիչ» նախագծի ժյուրիի անդամ, ՀՀ մշակույթի վաստակավոր գործիչ Նադեժդա Սարգսյանից հետաքրքրվեց՝ ինչպե՞ս է վերաբերվում նախագծի մասին դժգոհություններին, որն արգելելու պահանջով արդեն ստորագրահավաք է սկսվել change.org-ում:
Տիկին Սարգսյանն ասաց, որ նախագծի վերաբերյալ աղմուկն այդքան էլ արդարացված չէ, քանի որ «Ամենակարող երգիչ» նախագիծը միջոց է ցույց տալու համար, թե ինչպես չպետք է երգել. «Նախագծի նպատակն է՝ նպաստել, որ ռեստորաններում էլ գրագետ երգեն»
Երգչուհին նաեւ հավելեց, որ առաջիկայում ժողովրդական եւ ազգային երգ էլ կհնչի աղմկոտ նախագծի շրջանակներում, կհրավիրվեն լավագույն մասնագետները, քանի որ «Ամենակարող երգչի» նպատակն է ռեստորանային երգը մաքրելը: Նադեժդա Սարգսյանի ձեւակերպմամբ, ռեստորանային հանդիսատեսն էլ իրավունք ունի որակյալ երաժշտություն լսելու:
Ժյուրիի մեկ այլ անդամ՝ ռաբիս երգիչ Սպիտակցի Հայկոն (Հայկ Ղեւոնդյան) asekose.am-ին ասել էր, որ նախագծի վերաբերյալ աղմուկն իրեն չի հետաքրքրում. «Ինձ հրավիրել են հանդես գալ որպես ժյուրի, ես էլ համաձայնվել եմ: Առաջին հերթին, թող Հ1-ը մտածի, թե ինչու է ինձ կանչել և եթե պրոյեկտն արել են, թող պրոյեկտի տերը մտածի»:
Կարդացեք նաև
Իսկ ավելի վաղ, ճանաչված օպերային երգչուհի Հասմիկ Պապյանն էր իր զայրույթն արտահայտել Ֆեյսբուքում՝ գրելով՝ «Ոտքի´, հայ ժողովուրդ: Սա երկար մտածված, լավ կազմակերպված և մեր մշակույթը վերջնականապես կացնահարելու հանցավոր գործողություն է: Անհրաժեշտ է այն անհապաղ դադարեցնելու միջոցներ ձեռք առնել»:
Գոհար ՀԱԿՈԲՅԱՆ
