Քաղաքագետ Սերգեյ Մինասյանի մեկնաբանմամբ, այն, որ «Իսկանդերը» ձեռք է բերվել Ռուսաստանից, այլ ոչ թե Պարագվայից կամ Ուրուգվայից, արդեն իսկ քննադատական ալիքի տարրերից մեկն է դառնում:
Ինչու, որովհետեւ, ըստ քաղաքագետի, Հայաստանի հասարակական և քաղաքական դաշտը դարձել է Արևմուտք-Ռուսաստան առճակատման դաշտ:
«Իսկանդերն» ունեցավ նաև հասարակական ներքաղաքական դժգոհությունների ալիքի ռեակցիա, և հասարակությունը դժգոհում էր ոչ թե զինատեսակից, այլ ընդհանուր ներքաղաքական իրավիճակից»,- այսօր «Փաստարկ» ակումբում ասաց քաղաքագետը:
Նա «Իսկանդերի» ցուցադրումը համարում է ռազմական մեծ հնչողություն ունեցող փաստ, իսկ յուրաքանչուր լուրջ փաստ միշտ էլ դառնում է հասարակական քննադատության առարկա. «Մենք ունենք լուրջ խնդիրներ պետական մակարդակով հասարակության մեջ քարոզչական աշխատանքների հետ կապված: Ստացվեց մի իրավիճակ, որ մասնագետները փորձեցին մեկնաբանել «Իսկանդերի» ներկայությունը և այն փաստը, որ դա հանդիսանում է ոչ թե ռուսական բանակի, այլև ՀՀ ԶՈւ զինատեսակ, իսկ դա արվեց քննադատական ալիքից հետո: Սակայն միջազգային փորձը ցույց է տալիս, որ այդ նախապատրաստական աշխատանքն արվում է բավականին երկար ժամանակ, մինչև ցուցադրումը: Այդ առումով մենք լուրջ խնդիր ունենք»:
Կարդացեք նաև
Անդրադառնալով «Իսկանդերի» ցուցադրումից հետո Ադրբեջանի արձագանքին՝ պարոն Մինասյանն ասաց, որ այդ արձագանքը բավականին նյարդային էր, ինչպես նախորդ տարիներին:
Ըստ նրա, ձեռք բերված «Իսկանդերի» փաստը Ադրբեջանի համար բավականին դժվարեցնում է բալանսի վերականգնումը. «Այս պահին Ադրբեջանում ներքաղաքական զարգացումները և սոցիալ-տնտեսական իրավիճակը դժվարեցնում է նրա՝ մանևրելու հնարավորությունները:
Քանի որ մենք վերադառնում ենք ստատուս քվոյի իրավիճակին, ապա Ադրբեջանին նույնպես բավականին դժվար է լինելու հարմարվել այդ իրավիճակին: Եթե կայանա Հայաստանի և Ադրբեջանի նախագահների փարիզյան հանդիպումը, ապա փաստացի կնշանակի, որ մենք կվերադառնանք հետապրիլյան իրավիճակին, դա Բաքվի համար լուրջ և ցավալի որոշում կլինի: Հնարավոր հանդիպման օրակարգը կլինի այն, ինչը որ եղել է մինչև ապրիլյան իրադարձությունները»:
Արփինե ՍԻՄՈՆՅԱՆ
