Սեպտեմբերի 29-ին «Պոստ սկրիպտում» ակումբում ռեժիսոր Նիկոլայ Ծատուրյանն անդրադարձավ ՀՀ կառավարության նոր կազմին, խոսեց նաեւ մշակույթի նորանշանակ նախարար Արմեն Ամիրյանից ունեցած ակնկալիքներից:
«Բոլոր ազգերի դեմքը մշակույթն է, եւ եթե մշակույթին ուշադրություն չեն դարձնում, ուրեմն ազգին ուշադրություն չեն դարձնում, իսկ մեզ մոտ փաստորեն մշակույթն ահագին կաղում է»,-ասաց Նիկոլայ Ծատուրյանը:
Նրա ձեւակերպմամբ, քանի որ Արմեն Ամիրյանը գեղեցիկ դեմք ունի, դա արդեն լավ աշխատելու գրավական է: «Գոնե սրանից հետո գումարները արժանի մարդկանց կտրվեն, ոչ թե այլանդակ ֆիլմ նկարող ու ներկայացում անողներին»,-ասում է արվեստագետը:
Կարդացեք նաև
Նա նեղսրտել է, որ նորանշանակ վարչապետի եւ նրա ունեցվածքի մասին սկսել են ոչ բարենպաստ հրապարակումներ հայտնվել, նաեւ այն, որ Կարեն Կարապետյանը Մոսկվայի «մարդն» է:
Ինչ վերաբերում է կառավարության կազմին, Ծատուրյանի խոսքերով, այն մեզ մոտ «ֆայլաբազար» է հիշեցնում. «Օրինակ, Հասմիկ Պողոսյանը կենսաբան էր: Դա նույնն է, որ ինձ՝ ռեժիսոր մարդ, նշանակեն առողջապահության նախարար: Լավ է, որ Արմեն Ամիրյանը գոնե մշակույթի մարդ է ու հանցագործի դեմք չունի, ինչպես նախկին որոշ նախարարներ»:
Ռեժիսորը փաստում է, որ երկրում մշակութային նորմալ քաղաքականություն չի իրականացվել, չեն եղել հեռահար ծրագրեր: Մյուս կողմից էլ կարծում է, որ չպետք է շատ հարցերում հույսը կառավարության վրա դնել. «Հայաստանում կառավարությունը հիմնականում եղել է գեղ, կառավարության համար մշակույթը սահմանափակվում է օլիգարխի տղայի հարսանիքի երաժշտությամբ, դրա համար էլ հայտնվում է «Ամենակարող երգիչը» նախագիծ, ծնվում են՝ «Տաքսի, տաքսի, իմ յարին հասի»-ի որակի երգեր»:
Նիկոլայ Ծատուրյանն ասուլիսի վերջում նշեց, որ եթե գրիչ վերցներ ու գրեր բոլոր «բաց»-երի մասին, այնպես կարտահայտվեր, որ ինքը Հայաստանի Սալտիկով-Շչեդրինը կլիներ:
Գոհար ՀԱԿՈԲՅԱՆ
