Դատարանները շարունակում են քննել «Սասնա ծռեր» խմբավորման անդամների կալանքի երկարաձգման միջնորդությունները: Մեկ անգամ չէ, որ փաստաբանները հայտարարել են, որ նպատակ ունեն ներպետական ատյանները սպառելուց հետո դիմել Մարդու իրավունքների եվրոպական դատարան (ՄԻԵԴ):
Aravot.am-ը միջազգային իրավունքի փորձագետ Արա Ղազարյանին խնդրեց ներկայացնել Մարդու իրավունքների եվրոպական դատարանի փորձը, արդյոք նման նախադեպեր կան: Նա պատասխանեց. «Այստեղ պետք է նկատի ունենալ, որ եթե նրանք վիճարկում են երկարաձգվող կալանքը, ապա ցանկալի է, որ սպասեն մինչեւ մեղադրական դատավճիռը, որովհետեւ ՄԻԵԴ-ի համար կալանքը համարվում է շարունակվող մինչեւ մեղադրական դատավճիռը:
Եվ այդ ժամանակահատվածի ներքո պետք է ներկայացնեն: Գուցե իրենք հիմա ներկայացնեն առաջին, երկրորդ ժամկետներից հետո, որ հետո համալրում անեն, դա նույնպես նորմալ է: Բայց այդուհանդերձ, ՄԻԵԴ-ը համարում է, որ այդ վիճահարույց իրավիճակը դեռ ավարտված չէ, դեռ շարունակվում է, եւ ավարտվում է մեղադրական դատավճռով: Ուստի, հայցը ամբողջական լինելու համար պետք է վիճարկել այն ժամանակահատվածը, որն ընկնում է արգելանքի սկսման պահից մինչեւ մեղադրական դատավճիռը»:
Արա Ղազարյանը նշեց, որ Մարդու իրավունքների եվրոպական դատարանը Հայաստանի նկատմամբ մի քանի վճիռներ է կայացրել խափանման միջոց կալանավորման վերաբերյալ. «Կալանավորման առնչությամբ համակարգային շատ խնդիրներ ենք ունեցել, որոնք արդեն վերացվել են պրակտիկայի ընթացքում: Հիմա պետք է տեսնել, թե պաշտպանները կոնկրետ ինչ են վիճարկում: Այն, ինչ որ իրենք վիճարկում են ՄԻԵԴ-ի կողմից հաստատված բազմաթիվ ակտեր կան ե՛ւ ընդդեմ Հայաստանի, ե՛ւ այլ պետությունների»:
Կարդացեք նաև
Ամի ՉԻՉԱԿՅԱՆ
