Ոստիկանությունն ընդդեմ քաղաքացի Էռնեստ Ավանեսովի գործով դատաքննությունն այսօր Վարչական դատարանում ավարտվեց: Դատարանը հեռացավ խորհրդակցական սենյակ՝ վճիռ կայացնելու, այն կհրապարակվի նոյեմբերի տասին:
Ոստիկանությունը դիմել էր Վարչական դատարան անցյալ տարվա սեպտեմբերի 12-ին՝ Բաղրամյան պողոտայում էլեկտրաէներգիայի բարձրացման դեմ բողոքի ակցիայի ժամանակ ոստիկանության ծառայողի օրինական պահանջը չկատարելու համար Ավանեսովին վարչական պատասխանատվության ենթարկելու պահանջով:
Դատարանը մինչեւ խորհրդակցական սենյակ հեռանալը այսօր ուսումնասիրեց ոստիկանության ու Ավանեսովի պաշտպանի ներկայացրած տեսանյութերը բողոքի ակցիայից:
Տեսանյութերի հետազոտումից հետո դատարանը ոստիկանության ներկայացուցչից պարզեց՝ արդյոք ոստիկանական պատը, որը կազմվել էր սեպտեմբերի 11-12-ը, եղել է իրավաչափ, թե ոչ: Ոստիկանությունն այս առումով պնդում է՝ իրավաչափ է եղել խաղաղ հավաքի մասնակիցների երթը դադարեցնելը, իսկ ոստիկանության ներկայացուցիչն էլ նշեց, որ ոստիկանների պահանջը եղել է ընդամենը երթեւեկելի հատվածը ազատելու վերաբերյալ, ինչը ցուցարարների կողմից չի կատարվել:
Կարդացեք նաև
Իսկ Ավանեսովի պաշտպան Հայարփի Սարգսյանն էլ ասաց, որ հենց պատի շնորհիվ է Բաղրամյան պողոտան փակվել ոչ թե խաղաղ ցուցարարների կողմից: Փաստաբանը նաեւ ասաց, որ ոստիկանության պահանջը չի բխում վարչական իրավախախտումների մասին օրենսգրքի 182 հոդվածի պահանջներից եւ պնդեց իրենց հակընդդեմ հայցը՝ խնդրելով մերժել ոստիկանության հայցը անհիմն լինելու պատճառով:
Իսկ հակընդդեմ հայցով Հայարփի Սարգսյանը պահանջում է ոչ իրավաչափ ճանաչել անցած տարի սեպտեմբերի 12-ին ոստիկանների գործողությունները իր պաշտպանյալի նկատմամբ, որն արտահայտվել է իր պաշտպանյալի կարծիքն արտահայտելու, խաղաղ հավաքներին մասնակցելու եւ ազատության, անձեռնմխելիության, խոսքի ազատության իրավունքների ոտնահարմամբ:
Արփինե ՍԻՄՈՆՅԱՆ
