«Ահաբեկչությամբ իշխանության փոփոխությունը ցանկացած դեպքում ընդունելի չէ: Մարդ սպանելով՝ անօրեն ճանապարհով հնարավոր չէ օրինականություն հաստատել»,-
Կոմիտասի անվան պանթեոնում լրագրողների հետ զրույցում ասաց 1999 թվականի հոկտեմբերի 27-ի ահաբեկչության զոհ դարձած ԱԺ նախագահ Կարեն Դեմիրճյանի շիրիմին այցելած Անահիտ Բախշյանը՝ զուգահեռներ անցկացնելով «Հոկտեմբերի 27»-ի եւ «Սասնա ծռերի» դեպքի միջեւ:
Ըստ Անահիտ Բախշյանի՝ «Հոկտեմբերի 27»-ն ունի արտաքին հասցեատեր. «Վազգեն Սարգսյանը, երբ վարչապետ էր, ասաց՝ մենք տեր ենք մեր երկրին եւ մեր երկրի շահերից ելնելով ենք իրականացնելու արտաքին քաղաքականություն, որը Ռուսաստանին ձեռնտու չէր: Այսօր էլ տեսնում ենք, թե ինչպես ենք կաթիլ առ կաթիլ կորցնում մեր ինքնիշխանությունը՝ Ռուսաստանի ազդեցությամբ»:
Կարդացեք նաև
Անահիտ Բախշյանի խոսքով՝ եթե «Հոկտեմբերի 27» չլիներ, Արցախը կլիներ բանակցային կողմ. «Առանց Արցախի որեւէ հարց չէր լուծվի»:
Հիշեցնենք՝ հոկտեմբերի 27-ին սպանվել էին Ազգային ժողովի նախագահ Կարեն Դեմիրճյանը, վարչապետ Վազգեն Սարգսյանը, ԱԺ փոխնախագահներ Յուրի Բախշյանը եւ Ռուբեն Միրոյանը, նախարար Լեոնարդ Պետրոսյանը, պատգամավորներ Արմենակ Արմենակյանը, Միքայել Քոթանյանը, Հենրիկ Աբրահամյանը:
Լուիզա ՍՈՒՔԻԱՍՅԱՆ
