Այսօրվա «Հայկական ժամանակ» թերթից տեղեկացա, որ երեկ՝ հոկտեմբերի 27-ին ձերբակալվել է դատավոր Իշխան Բարսեղյանը (լուսանկարում): Այս լուրը ինձ զարմացրեց այնքանով, որ այդ նույն երեկոյան, ձերբակալությունից 2 ժամ առաջ ես հանդիպեցի Իշխան Բարսեղյանին մի անձնավորության հետ կանգնած: Այդ անձնավորությունը ով էր, իրենից ինչ էր ներկայացնում, ինչպիսի պետական մարմնի ներկայացուցիչ էր՝ չեմ կարող ասել: Բայց գարշահոտ դիմանկար ուներ նա եւ վանող էր իր արտաքինով:
Ես չէի ցանկանում, որ այդ անձնավորության հետ շփվեր Իշխան Բարսեղյանը, ում ես ճանաչում եմ ավելի քան մեկ տարի: Բայց որքան ջանքեր թափեցի դադարեցնելու նրանց շփումը, ցանկանալով Իշխանին հասկացնել, որ այդ մարդը վտանգավոր տիպ է երեւում, այդպես էլ չկարողացա:
Եկավ, մի մեքենա կանգնեց Շենգավիթի դատարանի մոտ, անձնավորության հետ Իշխան Բարսեղյանը նստեց, ինձ ցտեսություն ասաց, եւ մեքենան շարժվեց:
Մերուժան ՀՈՎՀԱՆՆԻՍՅԱՆ
Ինչպիսի հանգամանքներում եւ ինչու է ձերբակալվել Իշխան Բարսեղյանը՝ չեմ կարող գուշակել: Բայց Իշխան Բարսեղյանի հետ գտնվող այդ մարդը հետապնդող անձնավորության տպավորություն էր թողնում: Թե ինչու Իշխանը չէր ընկալում այդ երեւույթը, ինձ զարմացնում է:
Կարդացեք նաև
Այսուհետեւ գուցե անձինք գտնվեն, որ վկայություններ կտան Իշխան Բարսեղյանի անցյալի կամ ներկայի մասին, ոմանք կվկայեն ճշմարտությունը, ոմանք կզրպարտեն: Ժողովրդական խոսք է՝ եզն ընկավ, դանակավորները շատացան: Ես ափսոսում եմ այդ մարդուն եւ ցավում եմ կատարվածի համար: Ի լրումն վերոհիշյալ ասածիս, ինձ համոզում է հակառակը այն մեղադրանքների, որոնք նշված են թերթում, քանզի քիչ չեն ինչպես կոմունիստների ժամանակ, այդպես էլ այսօր, ակնհայտ անմեղ անձի նկատմամբ ստեղծվող արհեստական մեղադրանքները: Քիչ չեն նաեւ այսօր հանիրավի դատապարտված անձինք, ովքեր վաղը արդարանալու են եւ ամոթանք են տալու իրենց նկատմամբ մեղադրանք հարուցողներին:
Մերուժան ՀՈՎՀԱՆՆԻՍՅԱՆ
Հ. Գ. «Հայկական ժամանակ» օրաթերթը գրում է. «Երեկ ձերբակալվել է Երևանի Շենգավիթ վարչական շրջանի ընդհանուր իրավասության դատարանի դատավոր Իշխան Բարսեղյանը: Մեր տեղեկություններով, նա կասկածվում է կաշառք վերցնելու մեջ: Դատավորը ձերբակալվել է փողոցում:
Նույն շրջանակներից հայտնում են, որ Բարսեղյանը ինչ-որ քաղգործով կաշառք է վերցրել եւ հենց նույն պահին էլ ԱԱԾ-ն նրան ձերբակալել է: Ընդ որում, խոսքը շատ փոքր գումարի մասին է՝ 500-1000 դոլար: Քրեական օրենսգրքի 311 հոդվածի 4-րդ մասով նրան սպառնում է 7-12 տարվա ազատազրկում:
Մեր աղբյուրները հայտնում են նաեւ, որ ձերբակալված դատավորը շատ լուրջ անձնական խնդիրներ է ունեցել. նա վարկեր է ունեցել, կորցրել է տունը, բաժանվել ընտանիքից, ապրում է վարձակալած բնակարանում»:
