Ռուսաստանի և Ադրբեջանի միջև բազմակողմանի ռազմավարական գործընկերության հիմքում ընկած են դարերի ընթացքում ձևավորված բարեկամական և բարիդրացիական հարաբերությունները: Այս մասին ասվում է Ռուսաստանի նախագահ Վլադիմիր Պուտինի՝ Բաքվում ընթացող ռուս-ադրբեջանական 7-րդ միջտարածաշրջանային ֆորումի անդամներին ուղղված ուղերձում:
«Համոզված եմ, որ այս հանդիպումը տեղի կունենա երկու երկրների իշխանության և գործարար շրջանակների ներկայացուցիչների, փորձագետների և հասարակական կազմակերպությունների կառուցողական երկխոսության ձևաչափով: Դրա օրակարգում արտացոլում կգտնեն այնպիսի հարցեր, ինչպիսիք են տնտեսական և ֆինանսական համագործակցության ամրապնդումը, գիտական, կրթական և մշակութային ոլորտներում կոոպերատիվ կապերի խորացումը»,- ասվում է ուղերձում:
Ադրբեջանի նախագահ Իլհամ Ալիևի ուղերձում էլ նշվում է, որ ռուս-ադրբեջանական միջտարածաշրջանային ֆորումները «դրական ներդրում են ունենում ռազմավարական գործընկերության ամրապնդման գործում, նպաստում են մեր երկրների միջև փոխշահավետ համագործակցության աճին»:
Ուղերձում նշվում է, որ հաշվի առնելով երկու երկրների ուժեղ տնտեսական ներուժը և համատեղ աշխատանքի հարուստ փորձը, անհրաժեշտ է հետագայում ավելի սերտ միավորել ջանքերը և ավելի ակտիվացնել համագործակցությունը:
Կարդացեք նաև
Ֆորումի շրջանակում Ադրբեջանի և Ռուսաստանի միջև ստորագրվել է 12 փաստաթուղթ, որոնք նախատեսում են համագործակցություն մարդասիրական և տնտեսական ոլորտներում:
Պատրաստեց Վիկտորյա ԱՆԴՐԵԱՍՅԱՆԸ
