Գրեթե երեք ամիս առաջ, օգոստոսի 8-ի երեկոյան Տավուշի մարզկենտրոն Իջեւան քաղաքին հարակից Գանձաքար գյուղի Տլուտ սարամասից անհետացել է Գանձաքարի բնակչուհի, 1938թ. ծնված Սեդա Զաքարյանը: Նա գյուղից 20 կմ հեռավորությամբ գտնվող սարամասում պահում էր իրենց ընտանիքի անասունները:
Նախկինում տեղեկություններ էին հայտնվել, թե ծեր կնոջը Կոտայքի մարզում տեսնող է եղել: Գանձաքարի նախկին գյուղապետ Շահեն Շահինյանն ասաց, որ Սեդա Զաքարյանին որոնել են Չարենցավանում, Հրազդանում եւ այլուր, սակայն ՝ ապարդյուն: Գանձաքար համայնքի նախկին ղեկավարի խոսքերով՝ անհետացած ծեր կնոջը շուրջ 15 օր սարում էին որոնում, սակայն արդյունք չի եղել, կարծես առեղծվածային պատմություն լինի:
Շահեն Շահինյանը հայտնեց, որ այժմ գանձաքարցիները չեն զբաղվում անհետ կորածի որոնմամբ: Նա ասաց, որ Սեդա Զաքարյանի տղան Գանձաքարում է բնակվում, նա անասնապահ է: Վերջինիս եղբայրը Ռուսաստանում է ապրում: Սեդա Զաքարյանը նաեւ ամուսնացած աղջիկ ունի, որը Գանձաքարի բնակիչ չէ: Հարազատները մեծ ցավ են ապրում,որ 78-ամյա կնոջ հետքն այդպես էլ չի գտնվում, նրանից որեւէ մասնիկ, մասունք չի հայտնաբերվում:
ՀՀ քննչական կոմիտեի Տավուշի մարզային վարչությունում Սեդա Զաքարյանի անհետացման կապակցությամբ քրեական գործ է հարուցվել ՀՀ քրեական օրենսգրքի 104 հոդվածի 1-ին մասով («Սպանությունը»): Քրեական գործի հոդվածը կփոխվի, երբ նրան գտնեն, նրա անհետանալու հանգամանքները բացահայտեն:
Կարդացեք նաև
Ոսկան ՍԱՐԳՍՅԱՆ
