ՀՅԴ խմբակցության ղեկավար Արմեն Ռուստամյանը այսօր ԱԺ ճեպազրույցների ժամանակ անդրադարձավ ԵԽԽՎ մոնիտորինգի հանձնաժողովի նիստին, որն ադրբեջանական մամուլում շահարկումների տեղիք է տվել: Նա ասաց. «Նիստի ընթացքի հետ կապված ներկայացվում է, թե կանխվել է հայ պատգամավորի սադրանքը: Այդ հայ պատգամավորը ես եմ, եւ եթե որեւէ սադրանք կանխվել է, նախ հատուկ հանձնաժողովը, ըստ էության աշխատելով գրեթե 1.5 տարի, ոչ մի կոնկրետ արդյունք չի տվել, առաջարկ է կատարվել այդ հանձնաժողովի ղեկավարի կողմից, որ վերածվի ուղղակի հանձնաժողովի: Ադրբեջանի մամուլը հեղեղված է դրանով, լոբբիստները լավ են աշխատել, բայց յուրովի են ներկայացրել: Այո, մենք դեմ ենք եղել այդ հանձնաժողովի աշխատանքներին: Հայտնի ձեւակարգ կա, ամեն անգամ օրակարգից օրակարգ է անցնում ձեւակերպումը՝ «ԼՂ եւ մնացած գրավյալ տարածքներ»: Ամենամեծ պրովոկացիան այն էր, որ հենց պարոն Շեննախը հայտարարեց, թե իբր մենք համաձայնել ենք այդ ձեւաչափով շարունակել նիստը: Նման բան չի եղել: Այ սա պրովոկացիա է, իրականությանը չի համապատասխանում: Մենք ասել ենք, որ այս ձեւակերպմամբ որեւէ իմաստ չենք տեսնում շարունակելու քննարկումը կոնֆլիկտի»:
Նա ասաց, որ ցանկացած կոնֆլիկտ կարող է քննարկվել, եթե երկու կողմերի համաձայնությունը կա, իսկ հայկական կողմը հայտարարել է, որ այս ձեւակերպմամբ ԼՂ հարցը չի քննարկվի արդեն սովորական գործող ենթահանձնաժողովում. «Բավականաչափ պատգամավորներ պաշտպանել են մեր մոտեցումը՝ հասկանալով, որ սա նշանակում է ձախողել քննարկումը Ղարաբաղի հարցով, եթե այս ձեւակերպումը պետք է լինի»:
Արմեն Ռուստամյանը համոզված է, որ այդ ենթահանձնաժողովն էլ չի գործի. «Պարոն Շեննախը անպայման ուզում է ինչ-որ մի բան ղեկավարի, երեւի դրա համար ուզում է ինչ-որ մի բան ձեւավորվի, որ ինքը նախագահի: Այդ սուտ, կեղծ լուրը, որ տարածել էր, ես կանխեցի, իբր մենք համաձայնել ենք քննարկել»:
Արմեն Ռուստամյանն ասաց, որ հիմա հայկական կողմը ոչ թե բոյկոտելու է հանձնաժողովի նիստերը, այլ լեգիտիմ իրավունք ունի հրաժարվելու քննարկումից՝ այդ ձեւակերպմամբ:
Կարդացեք նաև
Հռիփսիմե ՋԵԲԵՋՅԱՆ
