Թուրքիայում քրդական խնդիրը նոր սրացում է ստացել նոյեմբերին, երբ ձերբակալվեցին Թուրքիայի խորհրդարան անցած «Ժողովուրդների դեմոկրատական կուսակցության» մի շարք անդամներ: «Հենարան» մամուլի ակումբում այսօր թուրքագետ Գեւորգ Պետրոսյանը նշեց, որ էրդողանի «քրդական հեղաշրջումը» շարունակվում է. «Երեկ տեղեկություններ տարածվեցին, որ ձերբակալվել է քուրդ ականավոր առաջնորդներից Ահմեդ Թյուրքը. սա նշանակում է, որ էրդողանը կանգ չի առնում եւ շարունակելու է քրդական ուժերին չեզոքացնել, իսկ «Քրդստանի աշխատավորական կուսակցության» դեմ զինված գործողությունները շարունակվում են»:
Փորձագետի դիտարկմամբ՝ առաջիկայում եւս մի շարք քուրդ գործիչների կձերբակալվեն: Անդրադառնալով «Ժողովուրդների դեմոկրատական կուսակցության» պատգամավոր, հայազգի Կարո Փայլանին՝ թուրքագետը նշեց. «Խոսակցություններ տարածվեցին, որ նա ձերբակալվել է, բայց լուրը հերքվեց: Նա ամենակարեւոր դերակատարներից չէ, որ իր վրա մեծ ուշադրություն դարձնեն, բայց իրադարձությունների նման շարունակականության դեպքում նա նույնպես կարող է հայտնվել թիրախում»:
Ինչպես նշեց Գեւորգ Պետրոսյանը, Էրդողանը փորձում է Թուրքիայի խորհրդարանը պատրաստել սահմանադրական բարեփոխումների օրինագիծն ընդունելուն, ինչին դեմ է «Ժողովուրդների դեմոկրատական կուսակցությունը»: Հետեւաբար, որքան վերջինիս պատգամավորները քիչ լինեն խորհրդարանում, այնքան մեծ կլինեն օրենքն անցկացնելու հնարավորությունները:
Կարդացեք նաև
Լուիզա ՍՈՒՔԻԱՍՅԱՆ
