Հայաստանի կառավարությունը մտադիր է բյուջետային վարկ տրամադրել «Նաիրիտ 2» ՓԲԸ-ին: Այս մասին տեղեկանում ենք կառավարության դեկտեմբերի 1-ի նիստի օրակարգից:
Ըստ որոշման նախագծի, «Նաիրիտ-2»-ին կտրամադրվի 41 միլիոն դրամ բյուջետային վարկ՝ «Նաիրիտ Գործարան»-ի աշխատակիցների 2016-ի հուլիս ամսվա աշխատավարձերի եւ դրան հավասարեցված վճարումների, օգոստոսի 1-ի դրությամբ կատարված վերջնահաշվարկների գծով պարտավորությունների վճարման համար:
Վարկը տրամադրվում է Հայաստանի այս տարվա պետական բյուջեի հաշվին՝ մինչեւ 2020 թվականի դեկտեմբերի 10-ը մարման ժամկետով, տարեկան 1.0% տոկոսադրույքով՝ առանց պարտավորության կատարման ապահովման միջոցի:
Բացի այս, ֆինանսների նախարարին հանձնարարվում է՝ «Ապահովել հսկողություն՝ «Նաիրիտ-2» ՓԲԸ-ի կողմից բյուջետային վարկի մարման համար` սույն որոշման 1-ին կետում նշված ժամկետում, բայց ոչ ավելի ուշ, քան «Նաիրիտ Գործարան» ՓԲԸ-ի սնանկության վարույթով օրենքով սահմանված հերթով սույն որոշման 1-ին կետում նշված աշխատավարձերի եւ դրան հավասարեցված աշխատավարձերի, վերջնահաշվարկների գծով պահանջների իրավունքների գումարները ստանալուց հետո 10-օրվա ընթացքում»:
Կարդացեք նաև
Այս որոշումն ուժի մեջ է մտնում պաշտոնական հրապարակմանը հաջորդող օրվանից:
Նշենք, որ «Նաիրիտ գործարան» ՓԲԸ-ն նոյեմբերի 28-ին դատարանի որոշմամբ սնանկ է ճանաչվել՝ ՀԷՑ-ի հայցադիմումի պահանջով:
Նելլի ԲԱԲԱՅԱՆ
