Ադրբեջանին սահմանակից Տավուշի մարզի վարորդները դժգոհում են ավտոգազալցավորման ճնշման կայաններում առկա բարձր գներից: Նոյեմբերյանի, Իջեւանի, Դիլիջանի տարածաշրջանների ավտոզալցավորման ճնշման կայաններում մեկ խորանարդ մետր գազը վաճառվում է 200 դրամով: Գեղարքունիքի մարզի Սեւան քաղաքի ԱԳԼՃԿ-ներում մեկ խորանարդ մետր գազի գինը 170 դրամ է: Բացի այդ, Սեւանում եղանակը ցուրտ է, լիցքավորված գազը հնարավորություն է տալիս ավտոմեքենայի ավելի մեծ երթ կատարել: Իսկ Տավուշի մարզում ավտոմեքենան լիցքավորվելուց հետո կարճ ժամանակ անց գազը «նստում է», լիցքավորված գազով մեքենան համեմատաբար քիչ տարածություն է անցնում: Տավուշի մարզի Նոյեմբերյանի տարածաշրջանի տարածքով է Վրաստանից Հայաստան մտնում Ռուսաստանից սկիզբ առնող գազատարը, որից սնուցվում են Հայաստանի ավտոգազալցավորման ճնշման կայանները:
Տավուշի մարզի վարորդների համար զարմանալի է , որ Տավուշի մարզի հեռավոր, սահմանամերձ Բերդի տարածաշրջանի ավտոմեքենաների գազալցավորման կայաններում մեկ խորանարդ մետր գազի գինը 180 դրամ է, ավելի էժան, քան Տավուշի մարզի այլ տարածաշրջաններում:
Տավուշցի վարորդները մեզ դժգոհելով ավտոմեքենաները լիցքավորող գազի թանկ գներից, ցանկություն հայտնեցին, որ տնտեսական մրցակցության պաշտպանության պետական հանձնաժողովը ուսումնասիրություն կատարի եւ պարզի, թե ինչ պատճառով է սահմանամերձ Տավուշի մարզում ավտոմեքենաները լիցքավորող գազը այլ մարզերի համեմատ թանկ:
Կարդացեք նաև
Ոսկան ՍԱՐԳՍՅԱՆ
