ՀՀ նախկին վարչապետ Հովիկ Աբրահամյանը դեռեւս 2016-ի հուլիսին կառավարության նիստերից մեկի ժամանակ հայտարարել էր, որ հրաժարվում է Հայաստանի պետական տնտեսագիտական համալսարանի (ՀՊՏՀ) կառավարման խորհրդի նախագահի պաշտոնից՝ աշխատանքային ծանրաբեռնվածության պատճառով: Նա նաեւ հավելել էր, թե առաջիկա խորհրդի նիստում կառաջարկի ԿԳ նախարարության հետ միասին քննարկել խորհրդի նոր նախագահ ընտրելու հարցը:
Չնայած սրան, Հովիկ Աբրահամյանը շարունակում է մնալ որպես տնտեսագիտական համալսարանի խորհրդի գործող նախագահ:
Aravot.am-ը այս մասին մեկնաբանություն խնդրեց տնտեսագիտական համալսարանի պրոռեկտոր Սեւակ Խաչատրյանից:
«Բոլորս էլ լսել ենք, որ նախկին վարչապետ, ՀՊՏՀ խորհրդի նախագահ Հովիկ Աբրահամյանը հայտարարել է ՀՊՏՀ խորհրդի նախագահի պաշտոնից՝ իր դուրս գալու մասին: Ասեմ, որ այդ հայտարարությունից հետո մինչ օրս բուհի խորհրդի նիստ չի եղել, և ես տեղյակ չեմ հիմնադիրի ներկայացրած ցուցակում եղե՞լ է փոփոխություն, թե՞ ոչ: Կարծում եմ՝ այս հարցի վերաբերյալ հստակ պատասխան կարող են տալ կառավարությունից կամ ԿԳ նախարարությունից»,-պատասխանեց ՀՊՏՀ պրոռեկտորը:
Կարդացեք նաև
Aravot.am-ը թեմայի վերաբերյալ մեկնաբանություն խնդրեց նաեւ ԿԳ նախարարության բարձրագույն եւ հետբուհական մասնագիտական կրթության վարչության պետ Ռոբերտ Սուքիասյանից: Պարոն Սուքիասյանը հայտնեց, որ
բուհերի կառավարման խորհուրդներում պարբերաբար կատարվում են համապատասխան փոփոխություններ՝ կախված խորհրդի անդամների կարգավիճակների փոփոխությունից: Ինչ վերաբերում է տնտեսագիտական համալսարանին, պարոն Սուքիասյանի խոսքերով, դեռեւս այս բուհի խորհրդի կազմի փոփոխություն չի իրականացվել, եւ ամեն ինչ կհստակեցվի մինչեւ դեկտեմբեր ամսվա վերջ:
Գոհար ՀԱԿՈԲՅԱՆ
