Զինծառայողների համար յուրաքանչյուր աշխատողի աշխատավարձից 1000 դրամ պարտադիր վճար գանձելու նախագիծն այսօր ԱԺ-ն երկրորդ ընթերցմամբ եւ ամբողջությամբ ընդունեց 98 կողմ 2 դեմ, 1 ձեռնպահ ձայներով:
ՀԱԿ խմբակցության պատգամավոր Հրանտ Բագրատյանը մինչ քվեարկությունը հայտարարեց, որ ինքը դեմ է, բայց չի քվեարկելու:
Նա պատասխանեց ՊՆ նախարար Վիգեն Սարգսյանի ամփոփիչ ելույթում հնչեցրած գնահատականներին՝ իր վերաբերյալ: Հիշեցնենք, որ Վիգեն Սարգսյանն ասել էր՝ «Երբ տնտեսագիտության դոկտոր պրոֆեսորի կողմից առաջարկ է արվում ժամկետային զինծառայողի համար աշխատավարձ սահմանել, որին ես կողմ կլինեի որպես ՊՆ նախարար, նա պետք է հաշվետվություն տա իրեն, որ իր առաջարկած հարցի գինը նույնչափ է, որքան եղել է իր ղեկավարած կառավարության պետական բյուջեն ամբողջությամբ: Եթե այսօր այդպիսի առաջարկ կարելի է անել, դա գնահատական է այս տարիների մեր երկրի ունեցած առաջընթացի, նաեւ այս կառավարության հաջողությունների»:
Հրանտ Բագրատյանը պատասխանեց. «Ես իրոք 3 տարի է առաջարկել եմ կառավարությանը բանակը դարձնել վճարովի, ՊՆ նախարարը ասել էր, որ կողմ է դրան, երեկ փորձեց քննադատել»: Ինչ վերաբերում է բյուջեին, նա ասաց, որ իր ժամանակ սահմանին ԱԱՀ չի գանձվել, իսկ դա բյուջեի կեսն է, բացի այդ, թվում է թե բյուջեն մեծացել է, բայց գնաճն էլ է մեծացել:
Կարդացեք նաև
Քվեարկությունից հետո նաեւ Արամ Մանուկյանը հայտարարեց, որ շփոթվել են, իրենք կողմ են քվեարկել, բայց դեմ են նախագծին:
Հռիփսիմե ՋԵԲԵՋՅԱՆ
