«Միացյալ Հայաստան» շարժումն առաջարկում է ստեղծել ԱԺ Վերին պալատ, որը վճռորոշ հարցերում կունենա «վետոյի» իրավունք: Այս մասին այսօր «Հայք» կենտրոնում լրագրողների հետ հանդիպմանն ասացին «Միացյալ Հայաստան» շարժման խորհրդի անդամներ՝ ԳԽ և ԱԺ նախկին պատգամավոր Ազատ Արշակյանը եւ ազատամարտիկ, արվեստաբան Արամ Ավետիսյանը:
«ՀՀ-Արցախ-Սփյուռք եռամիասնության կարիքը կա, այդ մասին տասնամյակներ խոսվում է: Կարեւոր է երկպալատ ազգային խորհրդարանի ստեղծումը, որի Վերին պալատը բաղկացած կլինի սփյուռքի գործիչներից: Այն կարող է լինել ներկայացուցչական մարմին, ինչպես հանրային խորհուրդը, եւ համահայկական հարցերում ունենալ վճռորոշ ձայնի հնարավորություն»,-ասաց Ազատ Արշակյանը:
«Մեր Սահմանադրությունը հատուկ ձեւավորված է այնպես, որ Արցախը եւ Սփյուռքը մասնակից չլինեն ՀՀ քաղաքական կյանքին, նրանք օրենսդիր մարմնում չեն կարող տեղ ունենալ: Դա ցավալի է: Կցանկանայի՝ այդ Վերին պալատի նախագահ լիներ Վազգեն Մանուկյանը: Նա վաստակ ունի՝ հայկական պետության հիմնադիրներից է, եւ հիմա Հանրային Խորհրդում թոշակառուի կարգավիճակը հարիր չէ նրան»,-հավելեց Ազատ Արշակյանը:
Բանախոսները նաեւ նշեցին, որ սատարում են Ատոմ Էգոյանի, Սերժ Թանկյանի, Արսինե Խանջյանի եւ Հրանտ Թոխատյանի առաջարկը, որը ենթադրում է առաջիկա ԱԺ ընտրություններում սփյուռքի գործիչների ներգրավվածություն որպես դիտորդներ:
Կարդացեք նաև
Հավելենք, որ «Միացյալ Հայաստան» շարժման խորհրդի անդամ, Արցախյան ազատամարտի պաշտոնաթող գնդապետ Արթուր Ալեքսանյանը («Ամարասի» Արթուր) ասուլիսին ներկա չէր առողջական խնդրի պատճառով:
Լուիզա ՍՈՒՔԻԱՍՅԱՆ
