ԵԱՀԿ Մինսկի խմբի համանախագահներ Իգոր Պոպովը (Ռուսաստան), Ստեֆան Վիսկոնտին (Ֆրանսիա) և Ռիչարդ Հոգլանդը (ԱՄՆ) հայտարարություն են տարածել՝ կապված դեկտեմբերի 29-ին Չինարի գյուղի մոտ տեղի ունեցած միջադեպի հետ:
«Բաքուն և Երևանը շարունակում են միմյանց մեղադրել 2016թ. դեկտեմբերի 29-ին Հայաստան-Ադրբեջան սահմանին ներթափանցման փորձի համար, որը հանգեցրել է մարդկային զոհերի: Հայաստանի զինված ուժերը շարունակում են իրենց մոտ պահել մարտերում սպանված ադրբեջանցի զինծառայողի մարմինը:
Հրադադարի խախտումն անընդունելի է և հակասում է կողմերի պարտավորություններին, որոնք ուժի չկիրառման պատասխանատվություն են ստանձնել: Համանախագահները կոչ են անում Հայաստանի և Ադրբեջանի առաջնորդներին ուշադիր ուսումնասիրել 2016թ. Վիեննայում և Սանկտ Պետերբուրգում ձեռք բերված համաձայնությունները, այդ թվում հնարավոր ամենակարճ ժամկետներում համաձայնեցնել ԵԱՀԿ հետաքննող մեխանիզմը: Համանախագահները նաև կոչ են անում, հաշվի առնելով հարցի բացառապես հումանիտար բնույթը, անհապաղ վերադարձնել մարդկային աճյունները՝ համաձայն 2010թ. Աստրախանի գագաթաժողովի համաձայնության: Մենք նաև կողմերին կոչ ենք անում վերջ տալ փոխադարձ մեղադրանքներին և անհրաժեշտ քայլեր ձեռնարկել տեղում իրավիճակը կայունացնելու համար:
Համանախագահներն իրենց ցավակցությունն են հայտնում զոհված զինվորների ընտանիքներին և բոլոր հայերին ու ադրբեջանցիներին, որոնց ամանորյա հույսերը մթագնել են անիմաստ կորուստների ցավից»:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
