Կառավարությունը մտադիր է լուծարել «Երկաթուղու շինարարության տնօրինություն» ՓԲԸ-ն: Այս մասին տեղեկանում ենք կառավարության հունվարի 12-ի նիստի օրակարգից:
Որոշման նախագծում նշված է՝ «Քանի որ, տրանսպորտի, կապի եւ տեղեկատվական տեխնոլոգիաների նախարարության «Երկաթուղու շինարարության տնօրինություն» ՓԲԸ-ն, բացի հարավային երկաթուղու երկաթուղային գծերի նախագծման եւ կառուցման նկատմամբ վերահսկողությունից չունի այլ գործառույթներ:
Ներկայումս գործընկեր՝ կոնցեսիոներ «Ռասիա ՖԶԷ» ընկերության հետ բանակցությունները անորոշ ժամանակով ձգձգվում են, ուստի նպատակահարմար է տրանսպորտի, կապի եւ տեղեկատվական տեխնոլոգիաների նախարարության «Երկաթուղու շինարարության տնօրինություն» ՓԲԸ-ն լուծարել»:
Հիշեցնենք, որ 2014 թվականի փետրվարին Հայաստան էր այցելել «Հայաստանի հարավային երկաթուղի», «Հայաստանի հարավային արագընթաց ճանապարհ» կոնցեսիոն ծրագրերի կառավարիչ, «Ռասիա ՖԶԷ» ներդրումային ընկերության գործադիր տնօրեն Ջոզեֆ Բորկովսկուն:
Նա ՀՀ կառավարությանն էր ներկայացրել «Հայաստանի հարավային երկաթուղու» կառուցման նախագիծը, վերջինիս տնտեսական ու տեխնիկական հիմնավորումը: Նախատեսվում էր, որ երկաթգծի երկարությունը կկազմի շուրջ 300 կմ, այն բաղկացած պետք է լիներ կամուրջներից եւ 60 թունելներից, պետք է ունենար 27 կայարան:
Բորկովսկին վստահեցրել էր, որ` «Հայաստանի Հարավային երկաթուղին», որի շահագործումը նախատեսվում էր սկսել 2022 թվականին, ամենակարճ ճանապարհով կկապի Ասիան եւ Կենտրոնական Եվրոպան, իսկ ծրագրի ընդհանուր արժեքը կազմում էր 3.2 մլրդ դոլար: Այն ժամանակ վստահեցնում էին, որ շինարարությունը կտեւի մինչեւ 6 տարի, ընդ որում ըստ ծրագրի՝ շինաշխատանքները պետք է մեկնարկեին 2016 թվականին, ավարտվեին՝ 2022 թվականին:
Եւ հիմա, փաստորեն, «Ռասիա ՖԶԷ» ընկերության հետ բանակցությունները ՝ անորոշ ժամկետով ձգձգվելու պատճառով «Երկաթուղու շինարարության տնօրինություն» ՓԲԸ-ն լուծարվում է:
Նելլի ԲԱԲԱՅԱՆ
