«Գիտական աշխատանքը պետք է գիտական թեմաներին նվիրված լինի, եթե գիտական աշխատանքը ուրիշ բաներ է շոշափում, ուրեմն այն գիտական չէ, չգիտեմ՝ ինչպես կարելի է որակել»,- Երեւանի քաղաքապետ Տարոն Մարգարյանին նվիրված ՀՀ գիտությունների ազգային ակադեմիայի արվեստի ինստիտուտի փոխտնօրեն, արվեստագիտության դոկտոր, պրոֆեսոր Աննա Ասատրյանի գիտական հոդվածի մասին ասաց ԳԱԱ նախագահ Ռադիկ Մարտիրոսյանը:
Նա ասաց, որ անձամբ չի կարդացել, ծանոթ չէ հոդվածին ու այդ պատճառով չի ցանկանա մեկնաբանել, ինչ վերաբերում է քննադատությանը, որ այն Տարոն Մարգարյանին նվիրված ձոն էր, պարոն Մարտիրոսյանն ասաց. «Անձամբ չեմ տեսել, չեմ կարդացել այդ աշխատանքը, ու չեմ կարող միանգամից ասել, բայց ցանկացած գիտաշխատող չափը պետք է պահպանի բովանդակային եւ այլ առումներով»:
Մեր հարցին՝ հնարավոր է այդ հոդվածը տիկին Ասատրյանը պատվերով էր գրել, պարոն Մարտիրոսյանը պատասխանեց. «Չեմ կարծում, որ այդպիսի բաներ պատվիրում են»:
Մեր մյուս բոլոր հարցերը, պարոն Մարտիրոսյանն առաջարկեց ուղղել գրավոր:
Կարդացեք նաև
Արփինե ՍԻՄՈՆՅԱՆ
