«Հայաստանի ներքաղաքական կյանքում ՝ կապված ապրիլի 2-ի կայանալիք խորհրդարանական ընտրությունների հետ, փոփոխություններ կլինեն»,- այսօր «Տեսակետ» ակումբում ասաց «Կովկաս» ինստիտուտի տնօրեն, քաղաքագետ Ալեքսանդր Իսկանդարյանը:
Նրա կարծիքով, ընտրություններն առանձնապես հետաքրքիր իրադարձություն չեն լինի, քանի որ կանխորոշված են արդյունքները: Ըստ նրա, հետաքրքիր իրավիճակ է սպասվում ընտրություններից հետո, երբ երկրում կձևավորվի քաղաքական նոր՝ խորհրդարանական համակարգ:
«Այդ շրջանում միահյուսվում է երկու տարբեր քաղաքական համակարգ,. լինելու է նախագահ, որն ընտրվել է հին Սահմանադրությամբ, լինելու է խորհրդարան, որն ընտրվել է նոր Սահմանադրությամբ»:
Անդրադառնալով ղարաբաղյան հիմնախնդրի կարգավորման գործընթացին՝ պարոն Իսկանդարյանը նկատեց, որ բանակցային գործընթացում փոփոխություններ չեն լինի. «ԵԱՀԿ Մինսկի խումբն արդեն մի քանի տարի զբաղվում է ոչ թե հակամարտության կարգավորման փորձերով, դրա հնարավորությունը չունի, այլ զբաղում է բռնության նվազեցման փորձերով կամ փորձում է բռնությունը պահել որոշակի շրջանակներում, այդ աշխատանքները կշարունակվեն»:
Կարդացեք նաև
Քաղաքագետը չի կարծում, թե լայնամասշտաբ պատերազմական գործողություններ կլինեն. «Կլինեն մեծ մասշտաբի էսկալացիաներ, բայց ՝ ոչ պատերազմ»:
Հարցին, թե ԱՄՆ նախագահ .Թրամփի կողմից վարվող քաղաքականությունը ի՞նչ փոփոխություն կարող է բերել բանակցային գործընթացում, Ալ. Իսկանդարյանը պատասխանեց, թե միջազգային հանրության ուշադրությունը գնալով նվազում է Կովկասի նկատմամբ, ինչն էլ կարող է ազդել ղարաբաղյան հակամարտության վրա, ուշադրության նվազումը որոշակի ազատություն է տալիս Ադրբեջանին:
Հարցին, թե ՀՀ-ում ԵԱՀԿ երևանյան գրասենյակի հնարավոր փակումը ինչ զարգացումներ կթողնի ՀՀ-Ադրբեջան հարաբերությունների վրա, պարոն Իսկանդարյանը պատասխանեց.
«Չգիտեմ՝ ինչպես կլուծվի խնդիրը, բայց գիտեմ, ինչպես հայտարարել էին, որ միայն մեկ երկիր է դեմ, որ այդ գրասենյակը գործի Հայաստանում: Գուշակում ենք, թե որ երկրի մասին է խոսքը: Հուսանք խնդիրը կլուծվի: Բայց ասում եմ, հեղափոխություն չի լինի, որ գրասենյակը փակվի»:
Արփինե ՍԻՄՈՆՅԱՆ
