Իջեւան քաղաքի բնակիչ, մասնագիտությամբ իրավաբան Դավիթ Սահակյանը 7 զավակների՝ 6 տղայի եւ աղջկա հայր է: Նրա 6 տղաները ծնվել են զույգերով: 5-րդ, 6-րդ տղաների եւ դստեր՝ Ռոզայի ծնվելուց հետո պետական բյուջեից, յուրաքանչյուր նորածնի հաշվով, հատկացվել է 1.5 միլիոն դրամ:
Սակայն 1.5 միլիոնական դրամից միայն 500 հազարական դրամն է Սահակյաններին կանխիկ տրվել: Մնացած գումարները տարեկան 13.5 տոկոս եկամտաբերությամբ գտնվում են բանկում: 2016թ. նոյեմբերին ՀՀ կենտրոնական բանկը փոխել է վերաֆինանսավորման տոկոսադրույքը, որի պատճառով բանկն այդ գումարի տարեկան եկամտաբերության տոկոսադրույքը նվազեցրել է 7.25-ի:
Դ. Սահակյանն ասաց, որ Հովիկ Աբրահամյանի ղեկավարած կառավարությունը 2016թ. առաջին նիստում մեկ տարի ժամկետով որոշում է ընդունել, որպեսզի պետության կողմից նորածնին հատկացված գումարից ընտանիքը կարող է ամսական 25 հազար դրամ իր բանկային հաշվեհամարից հանել:
2017թ. կառավարությունը նման որոշում չի ընդունել: Դ. Սահակյանը դժգոհեց. «Իմ երեխաներին հատկացված գումարներից 2.5 միլիոն դրամ ունեմ բանկում, սակայն դրանից չեմ կարող օգտվել: Որպեսզի երեխաներիս համար սնունդ, հագուստ, տակդիրներ գնեմ, ստիպված եմ լինելու բանկերից 24 տոկոսով սպառողական վարկ վերցնել»:
Կարդացեք նաև
Տավուշի մարզի Արճիս գյուղից Մարինե Ներսիսյանն ասաց, որ իր զույգ երեխաների համար, ընդհանուր առմամբ Ԡ միլիոն դրամ կանխիկ է ստացել, եւս 1 միլիոն դրամ բանկում է: 2016թ.ընտանիքը 1 միլիոնից ամսական մինչեւ 50 հազար դրամ կանխիկացնում էր, տնօրինում,այժմ այդ հնարավորությունը չունի: Մ. Ներսիսյանը դժգոհեց. «Ձմռան կեսին բազում խնդիրներ ունենք, իսկ բանկից գումար չենք կարողանում հանել»:
Իջեւան քաղաքի բնակիչ Գրիգոր Սարհատյանը 5 զավակների հայր է, որից մեծը՝ 11 տարեկան է, ամենափոքրերը զույգ են՝ տղա եւ աղջիկ, մեկ տարեկան, մեկ ամսական: Գ. Սարհատյանի կինը 3-րդ, մայրը՝ 2-րդ խմբի հաշմանդամ է: Գյուղատնտեսական բարձրագույն կրթություն ունեցող Գ. Սարհատյանը նամակներ է գրել Հովիկ Աբրահամյանին եւ Կարեն Կարապետյանին, որպեսզի իր երեխաներին հատկացված, բանկում գտնվող 2 միլիոն դրամով, լիզինգով, տրակտոր գնի ,գյուղատնտեսական աշխատանքներ կատարի, ծառայի գյուղացիներին, կարողանա պահել իր հիվանդ մորն ու կնոջը, բազմազավակ ընտանիքը:
Գ. Սարհատյանի առաջարկին կառավարությունն, ըստ էության, պատասխան չի տվել: Նա ասաց. «Պետբյուջեից այդ գումարները փոխանցվել է բանկերին, պետությունն ինչո՞ւ շահագրգիռ է, որ բազմազավակ ընտանիքները չկարողանան այդ գումարները կանխիկացնել, տնօրինել: Առաջարկում եմ, որ բանկում ունեցած մեր գումարների գոնե 40 տոկոսը որպես վարկ ստանանք այն տոկոսադրույքով, որով, որպես ավանդ, պահվում են բանկում»:
Գ. Սարհատյանը չի ցանկանում ընտանիքով Հայաստանից արտագաղթել, սակայն ասաց, որ Ռուսաստանում բազմազավակ ընտանիքները պետությունից սոցիալական մեծ աջակցություն են ստանում:
Ոսկան ՍԱՐԳՍՅԱՆ
