«Տեղավորողը» դատապարտվել է ազատազրկման 4 տարի ժամկետով
Վարդուշ Խաչատրյանը Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավճռի դեմ բողոք էր բերել: Նրա պաշտպանը անցյալ դեկտեմբերին բողոքը հետ է վերցրել:
Վարդուշ Խաչատրյանը մեղադրվել էր 2009թ. կատարած հանցագործության համար: Ըստ քրեական գործով առաջադրված մեղադրանքի, նա չարաշահելով թվով հինգ տուժողների՝ Նելլի Թարջումանյանի, Սուսաննա Անտոնյանի, Եղիշե Անտոնյանի, Մարտին Սահակյանի եւ Անահիտ Ոսկանյանի վստահությունը, Քուվեյթում բարձր վարձատրությամբ աշխատանքի տեղավորելու պատրվակով, խաբեությամբ հափշտակել է ընդհանուր 3.409.985 ՀՀ դրամին համարժեք 9.500 ԱՄՆ դոլար:
Անահիտ Ոսկանյանից Քուվեյթ մեկնելու համար մուտքի թույլտվություն ձեւակերպե-լու եւ տոմսեր գնելու պատրվակով ստացել էր 1.500 ԱՄՆ դոլար գումար։
Սուսաննա Անտոնյանից նույն պատրվակով ստացել էր 2.000 ԱՄՆ դոլար գումար, եւ մսխել անձնական կարիքների համար: Մյուս տուժողներից նույնպես ստացել էր երկու հազարական դոլար եւ հափշտակել:
Կարդացեք նաև
Այս գործի քննությունը եղել է արագացված ընթացակարգով: Ամբաստանյալն իրեն մեղավոր էր ճանաչել, համաձայն էր մեղադրանքի հետ:
Դատարանը հաշվի էր առել, որ կալանավորվածը վատառողջ է, համաձայնել է մեղադրանքի հետ եւ զղջացել կատարած հանցանքի համար եւ որ նա առաջին անգամ էր դատապարտվում։
Տուժողները քաղաքացիական հայցեր չհարուցեցին։
Ռ. Մ.
«Առավոտ»
18.01.2017
