Միացյալ Նահանգների նորընտիր նախագահ Դոնալդ Թրամփի գահակալությունից հետո ՖԻԴԵ-ի նախագահ Կիրսան Իլյումժինովն իր փաստաթղթերը ուղարկելու է ԱՄՆ-ի պետ դեպարտամենտ՝ իրեն ԱՄՆ մուտք գործելու իրավունքը վերականգնելու նպատակով:
ԱՄՆ-ի ֆինանսների նախարարությունը 2015 թվականի նոյեմբերին ՖԻԴԵ-ի նախագահի անունը մտցրել է «սեւ ցուցակ»՝ նրան մեղադրելով Սիրիայի նախագահ Բաշար Ասադին աջակցելու մեջ: Այդ պատժացուցակում հայտնվելու պատճառով Իլյումժինովը չկարողացավ ներկա գտնվել Նյու-Յորքում անցկացված շախմատի աշխարհի թագի համար Մագնուս Կարլսեն-Սերգեյ Կարյակին մրցամարտին:
Այն ժամանակվանից Իլյումժինովը հայտարարել էր, թե կշարունակի շփվել ԱՄՆ պետդեպի հետ՝ պատժացուցակից իր անունը հանելու եւ այդ երկիր մուտք գործելու իրավունքը վերականգնելու համար, իսկ ավելի ուշ ստիպված եղավ դատական հայց ներկայացրել Միացյալ Նահանգների ֆինանսների նախարարության դեմ:
«Այնպիսի տպավորություն է, որ ոչ-ոք չի աշխատում. Ոչ ֆիննախը, ոչ պետդեպը, ոչ էլ դեսպանատունը: Զանգերին չեն պատասխանում: Իմ անձնագիրը նոյեմբեր ամսից դեռ դեսպանատանն է: Բայց շուտով նոր դեսպան կգա, պետական դեպարտամենտի եւ ֆինանսների նախարարության նոր ղեկավարներ կնշանակվեն: Հունվարի 21-ին, Դոնալդ Թրամփի գահակալման արարողությունից հետո ես կրկին իմ փաստաթղթերը եւ նամակ կուղարկեմ: Հույս ունեմ, որ հիմա արդեն ավելի արագ ԱՄՆ մուտք գործելու իրավունք կստանամ», – ասել է շախմատի միջազգային ֆեդերացիայի նախագահը:
ԱՇՈՏ ՀԱԿՈԲՅԱՆ
Կարդացեք նաև
«Առավոտ»
20.01.2017
