Շիրակի մարզպետ Հովսեփ Սիմոնյանը, որը Ուլյանովսկի նահանգապետ Սերգեյ Մորոզովի հրավերով եռօրյա այցով եղել էր այնտեղ, բանակցել է Շիրակի մարզից գյուղատնտեսական ապրանքատեսակներ Ռուսաստանի Դաշնության այդ մարզն արտահանելու: Սակայն, հյուրասիրության ժամանակ Հովսեփ Սիմոնյանին ասել են, որ առավել շատ պանրատեսակների անհրաժեշտություն կա:
«Իրենք կաթնամթերքի լուրջ պահանջարկ ունեն, եթե մեր գործարարները կարողանան մի հատ գնան, տեսնեն, կկարողանանք արտահանումը կազմակերպել: Նրանք նաեւ ջերմոցների անհրաժեշտություն ունեն, եթե մենք կարողանանք այստեղից մեր բանջարեղենը արտահանենք…Ես հիմա մտածում եմ արագ հրավիրել գյուղատնտեսության ոլորտի գործարարներին, զրուցեմ իրենց հետ, հիմա բնական է՝ կարտոֆիլի մասին խոսելն իմաստ չունի՝ կապված սեզոնի հետ, իսկ այս պահին կաթնամթերքի արտահանումը կարել է կազմակերպել:
Կարդացեք նաև
Շատ հեռու չէ, շատ ծախսեր էլ չի պահանջվի, եթե այսօր կարելի է Մոսկվա 30-40 հազար դրամով հասնել, թող 25 հազար էլ Մոսկվայից Ուլյանովսկ լինի, 65 հազար դրամ կկազմի, գնալ-գալը թող լինի 120-130 հազար դրամ, կարելի է գնալ, պայմանավորվել, որոշակի խնդիրներ լուծել: Եթե մեկը ցանկություն ունենա, ես կկապվեմ նահանգապետի հետ, այնտեղ խոստացել են հայկական առեւտրի տուն տրամադրել մեզ, իրենք հնարավորություններ ունեն շենքային: Առեւտրի տան միջոցով կարելի է կազմակերպել արտահանումը, այդ տան միջոցով մեր արտադրանքը կարող է հասանելի լինել տեղի բնակիչներին»,-ասաց մարզպետը:
Հովսեփ Սիմոնյանն ասաց, որ հայկական համայնքն Ուլյանովսկում շատ ընդունված է, քաղաքի 6500 բնակիչներից 2000-ը հայեր են, կան նաեւ գյումրեցիներ: Վերջիններս տարբեր զբաղմունք ունեն, հիմնել են սուպերմարկետներ, աշխատում են շինարարության վրա: Ի դեպ, Ուլյանովսկի կենտրոնում կառուցվում է հայկական եկեղեցի, որի բարձրությունը 35 մետր է, հասել են արդեն գմբեթին:
Նշենք, որ Շիրակի մարզը Ուլյանովսկի մարզի հետ համագործակցում է դեռ 2009 թվականից, վերջիններիս միջեւ հենց այդ թվականից է համաձայնագիր ստորագրվել:
Նունե ԱՐԵՎՇԱՏՅԱՆ
Լուսանկարները՝ Շիրակի մարզպետարանի
