Արաբկիր Քանաքեռ եւ Զեյթուն վարչական շրջանների ընդհանուր իրավասության դատարանը քիչ առաջ հրապարակեց «Սասնա ծռեր» խմբի անդամ Աշոտ Պետրոսյանի կալանքը եւս երկու ամսով երկարաձգելու մասին որոշումը:
Պաշտպան Արայիկ Պապիկյանն Aravot.am-ին ասաց, որ միջնորդել էին Պետրոսյանին գրավի դիմաց ազատ արձակել, ինչը դատարանը մերժեց:
Ըստ նրա, Աշոտ Պետրոսյանը դատական նիստին մասնակցել է, բայց առողջական խնդիրների պատճառով դատարանին խնդրել է՝ որոշման հրապարակմանը չմասնակցել եւ ավելի շուտ իրեն տեղափոխել հիվանդանոց: Աշոտ Պետրոսյանը դատարանում հայտարարություն չի արել, հայտնել է, որ միանում է իր պաշտպանի առարկություններին:
«Քննիչի միջնորդությունն անհիմն է, նշված էր, որ Աշոտը, ազատության մեջ գտնվելով, կխոչընդոտի գործի քննությանը: Գործի քննությունը նոյեմբերից ավարտվել է, հանձնվել է պաշտպաններին, նախաքննություն չկա, ինչի՞ն կարող է խոչընդոտել: Անտրամաբանական հիմք է»,- ասաց փաստաբան Պապիկյանը:
Կարդացեք նաև
Նա նաեւ հավելեց, որ իր պաշտպանյալն առանձնահատուկ գանգատներ չունի, երբեմն ոտքի ցավեր է ունենում:
Հիշեցնենք, որ Աշոտ Պետրոսյանին մեղադրանք է առաջադրվել քրեական օրենսգրքի 219-րդ հոդվածի 3-րդ մասի 1-ին կետով՝ շենքեր, շինություններ, տրանսպորտի, հաղորդակցության կամ կապի միջոցներ զավթելը՝ կազմակերպված խմբի կողմից և 235-րդ հոդվածի 3-րդ մասով՝ կազմակերպված խմբի կողմից զենք-զինամթերք շրջանառելը։
Արփինե ՍԻՄՈՆՅԱՆ
