Այսօր ՀՀ ոստիկանապետ Վլադիմիր Գասպարյանի հրամանով պաշտոնազրկվել է Արթիկի երկարամյա ոստիկանապետ Տիգրան Պետրոսյանը: Նրա փոխարեն պաշտոնի է նշանակվել ծնունդով արթիկցի, երիտասարդ Խորեն Բարխոյանը: Վերջինս մի կարճ ժամանակահատված զբաղեցրեց Գյումրու «Մուշ» բաժնի ոստիկանապետի պաշտոնը, սակայն չարդարացրեց իրեն, ու Վլադիմիր Գասպարյանը նրան մայրաքաղաք տեղափոխեց՝ նշանակելով ավելի ցածր պաշտոնի:
Թե ո՞րն է Արթիկի երկարամյա ոստիկանապետին պաշտոնազրկելու պատճառը, պաշտոնական պատասխան դեռ չկա, սակայն կան ենթադրություններ, որ կապված է առաջիկա ԱԺ ընտրությունների հետ: Բանն այն է, որ Տիգրան Պետրոսյանը համարվում է «Հայկական վերածնունդ» կուսակցության հիմնադիր Արթուր Բաղդասարյանի մտերիմներից: Ոստիկանապետի եղբայրը՝ Հունան Պետրոսյանը, որն Արթիկի տարածաշրջանի Մեղրաշեն գյուղի գյուղապետն է, «Հայկական վերածնունդ» կուսակցության անդամ է, նա ևս պատրաստվում է մասնակցել ԱԺ ընտրություններին: «Հայկական վերածնունդն» ամենայն հավանականությամբ նրան թեկնածությունը կառաջադրի վարկանիշային ցուցակով, ու որպեսզի Տիգրան Պետրոսյանը այդ տարածքում չսատարի «Հայկական վերածննդին», նրան, այսպես ասած, չեզոքացրեցին դաշտից:
Նշենք, որ նախկին ոստիկանապետի ու ԱԺ պատգամավոր Մուշեղ Պետոյանի ջրերն էլ մի առվով չեն հոսում: Նախորդ ԱԺ ընտրություններում Մուշեղ Պետոյանն ու ոստիկանապետի եղբայրը՝ Հունան Պետրոսյանը, Արթիկն ու Մարալիկն ընդգրկող թիվ 36 ընտրատարածքում մեծամասնական ընտրակարգով պայքարում էին միմյանց դեմ: Մուշեղ Պետոյանն այդ ժամանակ այդ տարածքի ԲՀԿ պատասխանատուն էր, Հունան Պետրոսյանն էլ՝ ՕԵԿ-ի:
Այսօր էլ, որպեսզի ՀՀԿ վարկանիշային ցուցակով առաջադրվող Մուշեղ Պետոյանին կամ Խաչատուր Վարագյանին խանգարողներ չլինեն, Արթիկի ոստիկանապետին ազատեցին աշխատանքից: Նկատենք, որ թեև տեղացիներից շատերը չեն համակրում Տիգրան Պետրոսյանին, սակայն միաժամանակ ակնածանքով են խոսում նրա եղբոր՝ Մեղրաշենի գյուղապետ Հունան Պետրոսյանի մասին, որն ամենահաջողված գյուղապետերից է:
Կարդացեք նաև
Նունե ԱՐԵՎՇԱՏՅԱՆ
Մէկն ալ զինք պէտք է պաշտօնազրկէ -երկիրնիս գազանազուսպներու կարիք չունի ,,,
Ի պատասխան Նունե Արևշատյանի այն գրառմանը,որ«տեղացիներից շատերը չեն համակրում Տիգրան Պետրոսյանին »՝ ասեմ, որ միայն Տիգրան Պետրոսյան անձով և նրա նվիրված աշխատանքով է պայմանավորված քաղաքացիների վստահությունը ոստիկանության հանդեպ:Նրա և նրա աշխատակիցների շնորհիվ է,որ Արթիկ քաղաքը և նրա հարակից գյուղերը հանրապետության մյուս համայնքների նման չեն դարձել հանցագործության որջ: Ի գիտություն Ձեզ՝ նրա ղեկավարած ժամանակաշրջանում Արթիկի բաժինը իր բոլոր ցուցանիշներով, միշտ եղել է հանրապետության լավագույն բաժիններից մեկը: Տիգրան Պետրոսյան անձի, պրոֆեսիոնալ ոստիկանի աշխատանքը միշտ էլ գնահատվել է,նրա կարիքը միշտ էլ կզգացվի: Իսկ Հունան Պետրոսյանի հաղթանակը պայմանավորված չէ և երբեք էլ չի եղել ո ոստիկանության օժանդակությամբ, ժողովրդի մոտ նրա ունեցած հեղինակությունն ու հարգանքն էլ բավական է: