ՀՀԿ խոսնակ Էդուարդ Շարմազանովը դժվարանում է կարծիք հայտնել, թե արդյոք Հովիկ Աբրահամյանը ՀՀԿ-ից հեռանալուց հետո կդառնա ՀՀԿ-ի հակառակորդն ու կաշխատի այլ քաղաքական ուժերի օգտին:
«Այն գործիչները, որոնք դիմում են գրում ու դուրս գալիս ՀՀԿ-ից, հայտարարում, որ քաղաքականության մեջ են լինելու, բայց ոչ ՀՀԿ-ի հետ, մարդիկ կընտրեն իրենց ճանապարհը, որը մենք կտեսնենք»,- ասաց պարոն Շարմազանովը:
Հարցին, թե ե՞րբ պատրաստ կլինի ՀՀԿ-ի համամասնական ցուցակը, պարոն Շարմազանովը պատասխանեց. «Օրենքով սահմանված ժամկետում: Բոլորդ մտահոգվում եք հանրապետականի համար, մի՛ մտահոգվեք, մեր թե՛ համամասնական, թե՛ վարկանիշային ցուցակը լինելու է շատ ներկայանալի եւ ամենաամբիցիոզ»:
Հարցին, թե իրականությանը համապատասխանո՞ւմ են լուրերը, որ նախկին ՀՀ ոստիկանապետ եւ Արարատի ՀՀԿ մարզային կառույցի ղեկավար Ալիկ Սարգսյանի առջեւ խնդիր է դրվելու, որ սահմանափակի Հովիկ Աբրահամյանի ազդեցությունը, քանի որ նա ու նրա մտերիմները դուրս եկան ՀՀԿ-ից, պարոն Շարմազանովը պատասխանեց. «ՀՀԿ-ն որեւէ քաղաքական գործչի դեմ չի պայքարում, առավել եւս նախկին ՀՀԿ-ական Հովիկ Աբրահամյանի դեմ, մենք ընդդեմ չենք, հանուն ենք, անկախ նրանից, թե որ դաշտում կլինեն ձեր նշած հարգարժան գործիչները»:
Կարդացեք նաև
Արփինե ՍԻՄՈՆՅԱՆ
