Ապօրինի զենք կրելու մեջ մեղադրվող, «Հիմնադիր խորհրդարանի» անդամ Արմեն Միքայելյանի գործով դատական նիստում այսօր հարցաքննվեցին Միքայելյանի հայրը, քույրն ու կինը: Նրանք բոլորն էլ ականատես են եղել Միքայելյանի բերման ենթարկելու գործընթացին:
Արմեն Միքայելյանի կինը՝ Լիաննա Եդիգարյանը, քույրը՝ Սոնա Միքայելյանն ու հայրը՝ Ռաֆայել Միքայելյանը դատարանում նույն բանը պատմեցին, որ Արմեն Միքայելյանի հետ են եղել դեպքի օրը ու նույնիսկ բերման ենթարկելու պահին:
Վկաների պատմելով, Արմեն Միքայելյանի մոտ հրազեն չի եղել, երբ նրան բերման ենթարկելու պահին ոստիկանները քաշքշում էին, որ ոստիկանական մեքենա նստեցնեն, նրա վերնաշապիկը վերեւ է բարձրացել ու գոտկատեղը, ըստ Արմեն Միքայելյանի հարազատների, տեսանելի է եղել բոլորին՝ այդ թվում իրենց: Արմեն Միքայելյանի հարազատների պատմելով, այն մասում, որտեղից հետագայում հրաշքով հայտնաբերվել է հրազենը բերման ենթարկելու պահին ակնհայտ երեւացել է, որ հրազեն չկա:
Դատական նիստը վկաների հարցաքննությամբ հետաձգվեց: Դատարանը նիստը հետաձգեց, որ պաշտպանական կողմը ժամանակ ունենա գործում առկա ապացույցները օգտագործման համար անճանաչելի ճանաչելու վերաբերյալ միջնորդություն ներկայացնի:
Կարդացեք նաև
Հիշեցնենք, որ Արմեն Միքայելյանին մեղադրանք է առաջադրվել, որ նա քննությամբ դեռևս չպարզված հանգամանքներում , ապօրինի կերպով ձեռք է բերել և պահել 5,6 մմ տրամաչափի օղակավոր բոցավառման փամփուշտներով կրակելու համար ակոսափող հրազեն,իսկ հրազենի պահունակում ռազմամթերք հանդիսացող գործարանային արտադրության 5,6 մմ տրամաչափի 7 փամփուշտներ, որոնք հայտնաբերվել են 27.07.2016թ Արմեն Միքայելյանի մոտից Մալաթիայի ոստիկանության բաժանմունքում վերջինիս անձնական խուզարկության ժամանակ:
Հիշեցնենք նաեւ, որ նախորդ դատական նիստում Արմեն Միքայելյանը ցուցմունք էր տվել դատարանում՝ պնդելով որ հրազենն իր գոտկատեղին հայտնվել է ոստիկանների «թեթեւ ձեռքով»:
Արփինե ՍԻՄՈՆՅԱՆ