Ազգային ժողովի ընտրություններին մասնակցելու մտադրություն ունեցող կուսակցություններն ու դաշինքները ԿԸՀ դեռ փաստաթղթերը չներկայացրած՝ որոշ թեկնածուներ արդեն իսկ մարդաորսի մեջ են: Նրանք պատվիրակություններ են ուղարկում գյումրեցիների բնակարաններ, որոնք հարցաքննելուց բացի, թե տանը քանի մարդ կա, քանիսն են քաղաքում, քանիսը՝ դրսում, ձեռքի հետ փորձում են հասկանալ, թե այդ ընտանիքում ո՞ւմ են մտադիր ընտրելու:
Մի քանի օր է՝ նման շրջայցեր են կազմակերպում Գյումրու Անի թաղամասի բնակարաններ: Անի թաղամասի 7-րդ փողոց, 4-րդ շենքի բնակիչ Վահագն Խաչատրյանը մեզ հետ զրույցում պատմեց, որ իրենց տուն հյուրընկալվել են առավոտյան:
«Երեք օր առաջ էր, առավոտյան արթնացա երկու կանանց ձայներից, պարզվեց ներկա-բացակա անողների 2 հոգանոց խումբ էր: Նախ` լսեցի նրանց ու հայրիկիս խոսակցությունը. հայրիկիս հարցնում էին՝ ո՞ւմ եք համակրում, նա էլ նեղվելով պատասխանում էր՝ ինչի՞ եք հարցնում, ես միշտ համակրել եմ առաջին նախագահ Լեւոն Տեր-Պետրոսյանին:
Մոտեցա «պատվիրակության» անդամներին, հարցրեցի, թե ո՞ր իրավունքով եք նման հարցեր տալիս, ո՞վ եք, ինչու եք ներկա-բացակա անում, ո՞ր թեկնածուի կողմից եք ուղարկված: Հարցս անպատասխան թողնելով՝ հեռացան:
Կարդացեք նաև
Անկեղծ ասած, զարմացած եմ, որ մեր տուն էին այցելել, ոչ մի անգամ ռիսկ չէին անում՝ իմանալով, որ ես քաղաքական գործընթացների մեջ եմ, առաջին նախագահի համակիրն եմ: Այս ընտրություններին թեկնածուներ էնքան շատ են ու էնպիսի գազան ընտրապայքար է սպասվում, որ էլ ոչ մի բան հաշվի չեն առնում»,-մեզ հետ զրույցում ասաց Վահագն Խաչատրյանը:
Նունե ԱՐԵՎՇԱՏՅԱՆ
