Այսօր ԱԺ-ում կառավարությունը ներկայացրեց «Վարչական իրավախախտումների վերաբերյալ» օրենքում փոփոխությունների նախագիծ:
Արդարադատության փոխնախարար Սուրեն Քրմոյանը (լուսանկարում) ասաց, որ ներկայիս օրենսդրությունը վարչական պատասխանատվություն է նախատեսում`քրեակատարողական հիմնարկներում, ուղղիչ հիմնարկներում, ձերբակալվածներին, կալանավորների պահելու վայրերում գտնվող անձանց արգելված առարկաներ հանձնելու դեպքում: Այս հոդածը ընդունվել է տարիներ առաջ եւ փաստացիորեն վարչական պատասխանատվություն կիրառող մարմին չկա:
Փոխնախարարն ասաց, որ գրեթե ամեն օր կամ ամեն շաբաթ քրեակատարողական հիմնարկները հայտնաբերում են համապատասխան արգելված իրեր, առարկաներ, որոնք տարբեր անձինք փորձում են փոխանցվել կալանավայրերում պատիժը կրողներին: Եթե թմրամիջոց չեն փոխանցում, այլ` ուղղակի արգելված իր կամ առարկա, որեւէ պատասխանատվություն չեն կրում: Այն տուգանքները, որ պետք է գանձվեին, տարիներ ի վեր չեն գանձվում:
Կարդացեք նաև
Նախագծով առաջարկվում է տուգանելու իրավասություն տալ քրեակատարողականների պետերին կամ ձերբակալվածներին պահելու վայրերի պետերին:
Արտակարգ իրավիճակների փոխնախարար Հայկարամ Մխիթարյանն էլ ներկայացրեց «Զինծառայողների եւ նրանց ընտանիքների անդամների սոցիալական ապահովության մասին» օրենքում փոփոխության նախագիծը:
Նախագծով առաջարկվում է սահմանել, որ փրկարարական ծառայողներն էլ ծառայողական պարտականություն կատարելիս վնասվածք, հիվանդություն, խեղում ստանալու դեպքում ՀՀ տարածքում գործող բուժօգնության կազմակերպությունում բուժման, հետազոտության անհնարինության դեպքում, կարող են արտերկրում բուժում ստանալ: Բուժման եւ կեցության ծախսերն էլ կիրականացվեն պետական միջոցների հաշվին: Եթե բուժման ենթակա անձին անհրաժեշտ է ուղեկցող, հատուցվում է նաեւ ուղեկցող անձի ճանապարհածախսը եւ կեցությունը օտարերկրյա պետությունում:
Հռիփսիմե ՋԵԲԵՋՅԱՆ
