Առաջարկում եմ պատրաստել հայկական խոհանոցի զարդերից մեկը` ղափաման:
Անհրաժեշտ մթերքները
Դդում- 1 մեծը կամ մի քանի փոքրը
Բրինձ- 1 բաժակ
Չրեղեն- 1 բաժակ
Ընկուզեղեն- 1 բաժակ
Խնձոր-1 հատ
Մեղր- ըստ ճաշակի
Կարագ- ըստ ճաշակի
Համեմունքներ (աղ, դարչին, մեխակ)- ըստ ճաշակի
Կարդացեք նաև
Պատրաստման եղանակը
Բրինձը լվացեք, առատ ջրով դրեք եփելու: Չմոռանաք աղ անել ջրին: Կիսաեփ վիճակում անջատեք, քամեք:
Դդումները կտրեք գլխի մասից, «կափարիչը» հանեք: Եթե դդումը տանձաձեւ է, օգտագործեք միայն ներքեւի կլոր հատվածը: Մաքրեք դդումը սերմերից եւ միջուկի թելերից: Լավ լվացեք:
Առանձին թասի մեջ իրար խառնեք կիսաեփ բրինձը, չրեղենը, կտրատած խնձորը, համեմունքները, ընկուզեղենը: Դդումի պատերը ներսի մասից կարագոտեք, մի փոքր էլ աղ ցանեք, այնուհետեւ Լցոնեք ստացված խառնուրդով, ավելացրեք նաեւ մեղրն ու կարագը: Փակեք «կափարիչներով»: Եթե տանձաձեւ դդումի տակի հատվածն եք օգտագործում, կափարիչի փոխարեն կարող եք երկտակ փայլաթիթեղով ծածկել դդումը: Եթե բրինձը ավելանա, կարող եք լցոնել նաեւ խնձոր եւ նարինջ: Շատ համեղ են ստացվում:
Ջեռոցի թավայի հատակին կես բաժակ ջուր լցրեք, մեջը դրեք ձեր ղափամաները եւ տեղավորեք 200 աստիճան տաքացրած ջեռոցում: Կախված դդումի չափից` պատրաստ կլինի 15-40 րոպեից: Պատրաստ լինելը կզգաք դդումի արտաքին տեսքից, պետք է մի քիչ կարմրած եւ թորշոմած լինի:
Մատուցեք տաք վիճակում: Բարի ախորժակ:
Պատրաստեց ՄԵԼԱՆՅԱ ԲԱՐՍԵՂՅԱՆԸ
«Առավոտ»
11.02.2017
