Կրկին ԲՀԿ առաջնորդ ընտրված Գագիկ Ծառուկյանը փետրվարի 10-ին տեղի ունեցած «Բարգավաճ Հայաստան կուսակցության» համագումարի ժամանակ, անդրադառնալով երկրի սոցիալ-տնտեսական խնդիրներին, ի թիվս այլ հարցերի խոսեց նաեւ կուտակային կենսաթոշակային գումարների աննպատակահարմարության մասին, ինչն արժանացավ լսարանի հավանությանը:
Պարոն Ծառուկյանը մի շարք հարցեր բարձրացրեց, թե արդյո՞ք քաղաքացիների`կենսաթոշակի համար կուտակած գումարները 40 տարի հետո չեն արժեզրկվելու, արդյո՞ք այդ գումարները ֆիքսվել են տվյալ տարվա ոսկու գնով, քանի որ ոսկին 40 տարի անց էլ նույն արժեքն ունի եւ այլն:
Իսկ որ ամենաուշագրավն է Գագիկ Ծառուկյանն իր նախընտրական ելույթում առաջարկեց սառեցնել «կուտակայինը» եւ այդ գումարն օգտագործել թոշակների բարձրացման համար:
Այս առնչությամբ, փորձագետներից մեկը նկատեց, որ պարոն Ծառուկյանի հայտարարությունը ոչ մի տրամաբանության չի ենթարկվում, քանի որ ֆոնդի կառավարիչներին հանձնված կուտակային կենսաթոշակային գումարները հանդիսանում են անձի սեփականությունը, ինչպես օրինակ` բանկում պահվող ավանդը կամ հաշվի վրա առկա գումարը: Եվ դիպչել այդ գումարներին` կնշանակի ոտնձգություն կատարել մասնավոր սեփականության նկատմամբ. «Եթե այդպես առաջնորդվենք, նույն հաջողությամբ, կարելի է ցանկացած անձի բանկային միջոցները սառեցնել եւ ուղղել թոշակների բարձրացմանը: Դա նույն տրամաբանության մեջ է»:
Լուսինե ԲՈՒԴԱՂՅԱՆ
