Լրահոս
Օրվա լրահոսը

Մայր Աթոռ Սուրբ Էջմիածնում կատարվեց Տեառնընդառաջի նախատոնակը

Փետրվար 13,2017 22:20

Փետրվարի 14-ին Հայաստանյայց Առաքելական Սուրբ Եկեղեցին նշում է Տեառնընդառաջը` 40-օրյա մարդեղացյալ Աստվածորդու՝ մանուկ Հիսուսի տաճարին ընծայման տոնը։

Բերկրառատ տոնի սկիզբն ազդարարվեց փետրվարի 13-ի երեկոյան։ Տերունի օրվա կապակցությամբ, ուղեկցությամբ հոգևորականների թափորի, Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսն իջավ Մայր Տաճար, ուր կատարվեց Երեկոյան ժամերգություն:

Հավարտ ժամերգության, հանդիսապետությամբ Նորին Սրբության, տեղի ունեցավ նախատոնակ, ապա նաև` տարվա առաջին Անդաստանը, որի ընթացքում օրհնվեցին աշխարհի չորս կողմերը:

Այնուհետև «Քրիստոս փառաց» հոգեզմայլ տաղի երգակցության ներքո Մայր Տաճարի Իջման Ս. Սեղանի կանթեղից վառված մոմով Ամենայն Հայոց Կաթողիկոսը Հիսուս Քրիստոսին խորհրդանշող կենսապարգև լույսը փոխանցեց ներկա հավատավոր ժողովրդին:

Նախատոնակից հետո հանդիսավոր թափորն ուղղվեց դեպի միաբանական շենքի շրջաբակ, ուր, ներկայությամբ բազում հավատավոր հայորդիների, ձեռամբ Ամենայն Հայոց Հովվապետի, վառվեց Տեառնընդառաջի խարույկը:

Խարույկի շուրջ Մայր Աթոռի միաբանները և Գևորգյան հոգևոր ճեմարանի սաները հանդես եկան հոգևոր և ազգային երգերի կատարումներով:

Վերջում Նորին Սրբությունն օրհնեց ներկա բարեպաշտ ժողովրդին և տոնի առիթով փոխանցեց իր բարեմաղթանքները:

Մայր Աթոռ Ս. Էջմիածին                                                  

Տեղեկատվական համակարգ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Փետրվար 2017
Երկ Երե Չոր Հնգ Ուրբ Շաբ Կիր
« Հուն   Մար »
 12345
6789101112
13141516171819
20212223242526
2728