Փետրվարի 14-ին` ի պաշտպանություն «հաց բերողի» կայացած երթին մասնակցում էր նաեւ «Ժառանգություն» կուսակցության փոխնախագահ Արմեն Մարտիրոսյանը:
Լրագրողների հետ զրույցում պարոն Մարտիրոսյանը նշեց. «Ակնհայտորեն Արթուրն առողջական այնպիսի վիճակ չունի, որ իրեն նորից կալանավորեն, որովհետեւ սա արդեն աբսուրդ է, եթե մարդ մի անգամ կալանքից ազատվում է անբուժելի հիվանդություն ունենալու պատճառով, երկրորդ անգամ կալանավորելն անհեթեթություն է բառիս բուն իմաստով:
Մանավանդ, մարդը ոչ փախել է, ոչ թաքնվել է, իսկ երկրորդ անգամ նրան կալանավորելն անօրինական է, որովհետեւ արդեն իսկ հաստատված է նրա առողջության պատճառով անհամատեղելիությունը անազատության հետ: Պահանջում ենք ազատություն»:
Կարդացեք նաև
Արմեն Մարտիրոսյանի ձեւակերպմամբ, որպեսզի Հայաստանում համակարգային փոփոխություններ լինեն, նախ պետք է իշխանափոխություն լինի: «Ոչ միայն Արթուրն է, այլեւ «Սասնա ծռերը», մնացած քաղբանտարկյալները` Շանթը իր ընկերների հետ, Վոլոդյա Ավետիսյանը, մյուսները: Ցավոք, մենք Ադրբեջանի հետ նույն շրջանակում ենք մրցում` համակարգային կոռուպցիայի, քաղկալանավորների թվաքանակով, նաեւ ավտորիտար իշխանությունների հարցում»,- ասաց «Ժառանգություն» կուսակցության փոխնախագահը:
Հիշեցնենք, որ փետրվարի 9-ին Հատուկ քննչական ծառայությունը ձերբակալել է «Սասնա ծռեր» զինված խմբին օժանդակելու մեջ մեղադրվող, «Հաց բերող» անունը ստացած Արթուր Սարգսյանին: ՀՔԾ-ն ձերբակալման հիմք է համարել այն, որ Սարգսյանը փետրվարի 3-ին չի ներկայացել քննչական մարմնին: Նա ոստիկանության ՊՊԾ գնդի տարածքի գրավման գործով կալանավորված էր օգոստոսից եւ խափանման միջոցի փոփոխման արդյունքում 2016-ի դեկտեմբերի 31-ին ազատ էր արձակվել:
Գոհար ՀԱԿՈԲՅԱՆ
