Լրահոս
Օրվա լրահոսը

Ինչու են մշակույթի մարդիկ նախարարի հետ սեղան նստել

Փետրվար 15,2017 21:33

ՀՀ մշակույթի նախարարության ֆեյսբուքյան էջում հրապարակված է մի լուսանկար` «Երաժշտական» ընթրիք՝ նախարարի հրավերով» մակագրությամբ: Լուսանկարի հետ զետեղված տեղեկատվությամբ ասվում է, որ Արմեն Ամիրյանի հրավերով երեկոյան ընթրիքի սեղանի շուրջ հավաքվել են կոմպոզիտորներ և ստեղծագործական խմբերի ղեկավարներ՝ քննարկելու, թե ինչու ստեղծագործական խմբերը չեն կատարում հայաստանցի ժամանակակից կոմպոզիտորների գործերը եւ, ի վերջո, ի՞նչ տեսակի երաժշտություն է ուզում լսարանը:

«Նախարարական» ընթրիքին մասնակցել են Ռուբեն Ալթունյանը, Ռոբերտ Մլքեյանը Էդուարդ Թոփչյանը, Սոնա Հովհաննիսյանը, Սերգեյ Սմբատյանը եւ ուրիշներ:

Aravot.am-ը ճանաչված կոմպոզիտոր, ՀՀ ժողովրդական արտիստ Ռուբեն Ալթունյանից հետաքրքրվեց` ի՞նչ կարծիքի է նման ձեւաչափով հանդիպումների մասին:

«Տպավորված ենք… Խոսակցության եղավ հայ կոմպոզիտորների ստեղծագործությունների ավելի շատ կատարելու վերաբերյալ, ահագին հարցեր բարձրացվեցին: Մենք առաջին անգամ մշակույթի նախարարի հետ սեղանի շուրջ նստեցինք այս 40 տարվա մեջ, իսկապես լավ երեկո էր: Ընդհանուր խոսք էր գնում հայ կոմպոզիտորների գործերի քիչ կատարման մասին, ստեղծագործական խմբերի ղեկավարներն էլ ասացին, որ այնքան ենք կատարել, ուղղակի դուք տեղյակ չեք: Նաեւ ասացին, որ ցանկացած գործ կկատարեն, կարեւորը որակով լինի: Մյուս կողմից էլ ամեն ինչ սիմֆոնիկին չի կարելի առաջարկել, իրենք իրենց ծրագրերն ունեն»,-նշեց կոմպոզիտորը:

Նա նաեւ ասաց, որ վերջին անգամ սեղանի շուրջ նախկին նախարար Հասմիկ Պողոսյանի հետ է հանդիպել` 2 տարի առաջ արտասահմանում:

«13 հոգանոց ժողգործիքների անսամբլ ունեի, այդ անսամբլով մեկնել էինք արտասահման, որպեսզի միջոցառումներին հայկական երաժշտություն նվագեինք: Դա երկու տարի առաջ էր, հատուկ ընթրիք չի եղել, բայց երեկոները թեյ ենք խմել նախարարուհու հետ միասին, մեզ հետ նաեւ սփյուռքահայեր կային, բայց նման տեսակի կազմակերպչական զրույց-հանդիպում ոչ մեկի հետ չի եղել, ոչ Հովիկ Հովեյանի, ոչ էլ մնացածի»,-նշեց մեր զրուցակիցը:

 Գոհար ՀԱԿՈԲՅԱՆ

 Լուսանկարը` ՀՀ մշակույթի նախարարության ֆեյսբուքյան էջից:

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (3)

Պատասխանել

  1. Հ.Շ. says:

    Հարգելի Գոհար, չգիտեմ եթէ հոդվածի վերնագիրը քո հարցականն է, սակայն արտօնէ որ մի կերպ ջանամ պատասխանել:

    Մշակոյթի մարդոց էական կոչումը, գործը, պարտականությունն ու պատասխանատվությունը՝ … մշակոյթն է:

    Այո, կան երբեմն կարգ մը մշակոյթի անձիք, որոնք կ’որոշեն դառնալ քաղաքական ակտիվիստ: Թեպէտ շատ անճարակ են այդ ոլորտում, անոնցմէ ոմանց մղումներն ալ երբեմն վիճելի են, բայց ոչինչ, լաւ, ուզում են քաղաքական դաշտում մի բան ասել, մի բան անել, իրենց որոշումն է, հաջող:

    Սակայն կարելի չէ ակընկալել – կամ, կարծես թէ՝ պահանջել – որ բոլոր մշակոյթի մարդիկը դառնան քաղաքական գործիչներ:

    Կարելի չէ մշակոյթի մարդուն այպանել որ ինք ուզում է կեդրոնանալ իր կոչումին վրա:

    Հետեւաբար, թէ անոնք նախարարի սեղան նստեր են կամ ոչ, ի՞նչ կարեւորություն: Մշակոյթի մարդիկ ստիպված չեն բոյկոտ կատարելու պետության նկատմամբ:

    Աւելին՝ նոյնիսկ եթէ այդ սեղանին վրա նստելով, մշակոյթի անձ մը ակընկալում է որ օգուտ մը ստանալու է, իր արվեստին, մշակոյթի՛ն վերաբերյալ օգուտ մը, պիտի որ անկէ՞ ալ հրաժարի… Վասն ինչի՞, հանուն ո՞ւմ…

    Երկրում արդէն անցյալի մշակոյթի մակարդակից շատ բան չի մնացել: Ուզում ենք որ եղա՞ծն ալ վերջանա, անհետանա, հանուն քաղաքականության…

    Ամէն մարդ իր գործը որ կատարէ, շատ աւելի լաւ կը լինի ամէն բան: Արդէն, պէտք եղածից շա՜տ աւելի մեծ թիւով, բացառապէս քաղաքականությամբ զբաղվող մարդիկ կան Հայաստանում, երեւի դեռ աւելիին կարիքը չկա:

  2. Գոհար Հակոբյան says:

    Հարգելի Հ.Շ., կարծեմ նյութում որեւէ վիրավորական արտահայտություն չկա մշակույթի մարդկանց մասին: Ես էլ Ձեզ պես ուզում եմ, որ հրաշալի գործեր ծնվեն ու մշակույթի մարդիկ միշտ մնան իրենց բարձրության վրա:
    Հարգանքով` Գոհար Հակոբյան

    • Հ.Շ. says:

      հաւատացէք որ ոչ մի վիրաւորական բան չէի նկատած հոդվածում…
      թէ ոչ, կ’ասէի

      պարզապէս տեսա մի հետաքրքիր հարցական, հիմնված մտայնության մը վրա որու հաճախ եմ հանդիպել – ոչ միայն Հայաստանում -, մտածեցի ուրեմն պատասխանել, թերեւս կարդացող կը լինի… (ի դէպ, հակառակ ոմանց տպաւորության, այսօրվա միակ մեկնաբանությունս այս էջում է)

      նոյնպէս ու միշտ հարգանքով՝

      Հայդուկ Շամլեան

Պատասխանել

Օրացույց
Փետրվար 2017
Երկ Երե Չոր Հնգ Ուրբ Շաբ Կիր
« Հուն   Մար »
 12345
6789101112
13141516171819
20212223242526
2728