ՀՀ կրթության եւ գիտության նախարար Լեւոն Մկրտչյանը երեկ հանդիպեց ավագ դպրոցի տնօրենների հետ՝ մասնավորապես քննարկելու, թե ինչ խնդիրներ են առաջացել ավարտական քննությունները մեկ կիսամյակ շուտ անցկացնելու ընթացքում եւ արդյոք ավագ դպրոցների ղեկավարները նպատակահարմար գտնո՞ւմ են, որ հաջորդ տարվանից այդ քննությունները կազմակերպվեն ավելի վաղ։
Այսինքն՝ ոչ թե 12-րդ դասարանի առաջին կիսամյակի վերջում, ինչպես այս տարի էր, այլ 11-րդ դասարանն ավարտելիս։ Խոսքն այն փոփոխության մասին է, ըստ որի՝ շրջանավարտներին իրավունք էր տրվել պարտադիր երեք առարկաների (հայոց լեզու եւ հայ գրականություն, հայոց պատմություն, մաթեմատիկա) քննությունները ցանկության դեպքում հանձնել սովորականից շուտ, իսկ հաջորդ կիսամյակը տրամադրել իրենց ընտրած առնվազն երեք առարկաների ուսումնասիրությանը։
Երեւանի 118 ավագ դպրոցում հյուրընկալված տնօրենների մեջ կային մարդիկ, որոնք չողջունեցին նախարարի այս նորամուծությունը, բայց հիմնականում տրամադրվածությունն այնպիսին էր, որ իրենք պատրաստ են ավարտական քննությունները տեղափոխել 11-րդ դասարան։
Երեւանի 114 ավագ դպրոցի տնօրեն Ռուզաննա Կոստանյանն առաջարկում էր վերանայել այս փոփոխությունը՝ նկատելով, որ թեպետ դրանց հիմքում բարեփոխումների ցանկությունն էր, իրականում քննություններն արագացնելն այնքան էլ հաջողված տարբերակ չէ։ Տնօրենը հիմնավորեց, որ իր ղեկավարած դպրոցում 12-րդ դասարանի առաջին կիսամյակում ավարտական քննությունները հանձնել են այն աշակերտները, որոնք արդեն իսկ ընդունվել են Հայաստանում Ամերիկյան ու Ֆրանսիական համալսարաններ, եւ երկրորդ կիսամյակի համար ընտրել են, իր խոսքով, ձեւական առարկաներ՝ հասարակագիտություն, ֆիզկուլտուրա։ Իսկ դպրոցը նրանց մերժելու իրավունք չունի։ Արդյունքում ստացվում է, այդ աշակերտները 12-րդ դասարանի երկրորդ կիսամյակում առանձնապես անելիք չունեն։
Կարդացեք նաև
Բացի այդ, ըստ Ռուզաննա Կոստանյանի, ավարտական քննությունները ժամկետից շուտ հանձնելու դեպքում ծրագիրը կիսատ է մնում, ինչքան էլ որ այն կրկնություն է։
Նախարար Լեւոն Մկրտչյանն էլ իր հերթին չհամաձայնեց ավագ դպրոցի տնօրենի հետ՝ ընդգծելով, որ քննությունների վախով երեխային դպրոցում պահելը ճիշտ ուղի չէ։ Նշեց, որ նախկինում էլ, երբ այդ քննությունները 12-րդ դասարանի վերջում էին, միեւնույն է, որակի խնդիրը լուծված չէր։ Հետեւաբար, նախարարի համոզմամբ, պետք է մտածել, թե ինչպես անել, որ դասապրոցեսը հետաքրքիր լինի, երեխան զգա, որ դպրոցն իրեն ինչ-որ բան է տալիս, ցանկություն ունենա դասերին հաճախել ու սովորել։ Ինչ վերաբերում է արդեն բուհ ընդունված լինելուն, նա նկատեց, որ եթե անգամ կենտրոնի այդ դպրոցում խնդիրը մեծ տարածում ունի, նշված համալսարաններ դիմում են ընդամենը դիմորդների մոտ 2 տոկոսը։
Աննա ԶԱԽԱՐՅԱՆ
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
