«Ես՝ Դենիել Բլեյքս» ֆիլմը բրիտանական ֆիլմերի 15-րդ փառատոնի ընթացքում ցուցադրվող 7 ֆիլմերից առաջինն էր: Ֆիլմի ռեժիսորը Քեն Լոուչն էր, որը այս ֆիլմի համար երկրորդ անգամ ստացել է «Կաննի» կինոփառատոնի «Ոսկե արմավենու ճյուղ» մրցանակը:
Ֆիլմի գլխավոր հերոսը` Դենիել Բլեյքը, որին մարմնավորում է Դեյվ Ջոնսը, 59 ամյա հյուսն է, որը սրտի կաթվածի պատճառով չի կարողանում աշխատել: Հուսահատված դիմում է հիվանդության համար նպաստ տրամադրող կազմակերպության, բայց տեղի աշխատակիցները պնդում են, որ նպաստը ստանալու համար պիտի աշխատանք ունենա:
Չցանկանալով հանձնվել՝ հերոսը սկսում է աշխատանք փնտրել ու շարունակում է այցելել այդ կազմակերպություն՝ նպաստը պահանջելու նպատակով:
Երկար գործընթացի ժամանակ էլ Դենիելը հանդիպում է մի միայնակ մոր, որը երկու երեխաների հետ Լոնդոնից տեղափոխվել է Նյուքասլ ու ինքն էլ նպաստի համար դիմել է ու մերժվել: Դենիելը բարեկամանում է ընտանիքի հետ ու փորձում է հնարավորինս օգնել նրանց:
Կարդացեք նաև
Երբ նպաստավորող կազմակերպությունը վերջնականապես մերժում է Բլեյքին, նա բարկացած ու վիրավորված, կազմակերպության պատին ներկով գրում է. Ես՝ «Դենիել Բլեյքս, պահանջում եմ իմ բողոքարկման օրը նախքան սովամահ լինելս»:
Բողոքարկման օրը Դենիելը գնում է դատարան ու հանդիպում իրավունքների իր պաշտպանին, որը վստահեցնում է, որ գործը միանգամայն կշահեն: Սակայն Դենիել Բլեյքը մահանում է հենց այդ օրն ու այդպես էլ չի կարողանում ներկայանալ իր բողոքարկմանը:
Նրա մահվան օրը Քեյթին՝ միայնակ մայրը, որին Դենիելն օգնում էր, կարդում է այն ելույթը, որը Բլեյքը գրել էր բողոքարկման ժամանակ ասելու նպատակով: Ելույթը բարօրության համակարգի՝ իրեն ու մյուսներին անտեսելու, վատ վերաբերվելու մասին է:
Ֆիլմը օրինակն է գրեթե բոլոր երկրներում առկա անտարբերության, որը սոցիալական կազմակերպությունները դրսևորում են անապահով ընտանիքների նկատմամբ, որոնց մի մասն այդպես էլ չի գիտակցում իր իրավունքները:
Չնայած «Ես՝ Դենիել Բլեյքս» ֆիլմը լուրջ խնդիրներ է վեր հանում, բայց հումորային դրվագների շնորհիվ դահլիճում ժամանակ առ ժամանակ լսվում էին ծիծաղի ձայներ:
Դերասանական խաղն ու շատերին ծանոթ իրավիճակը, որը շոշափվում էր ֆիլմում, հանդիսատեսին սկզբից մինչև վերջ կլանեց ու հասցրեց այն հաղորդագրությունը, որն ուզում էր:
Մելանի ՍԱՐԳՍՅԱՆ
