«Լեռնային Ղարաբաղում անցկացվող յուրաքանչյուր ընտրություն նախորդի համեմատ առավել դրական է»,- փետրվարի 19-ին հայտարարեց ԼՂՀ Հանրաքվեի կենտրոնական հանձնաժողովի նախագահ Սրբուհի Արզումանյանը:
Երկուշաբթի կայանալիք հանրաքվեն Արցախում կայացած թվով երրորդ հանրաքվեն է. «Փետրվարի 20-ի հանրաքվեին մասնակցելու իրավունք կունենա 102 757 քաղաքացի, այսինքն՝ 711-ով ավելի, քան նախորդ խորհրդարանական ընտրությունների ժամանակ: Սա նշանակում է, որ Սահմանադրության հանրաքվեին մասնակցելու հնարավորություն է տրվելու Արցախի Հանրապետության բնակչության 69 տոկոսին»:
Հանրապետությունը անցկացվելու է հանրապետության ողջ տարածքում՝ 11 ընտրատարածք, յուրաքանչյուրը 8-9 հազար ընտրողներով. «Կազմավորվել է 280 հանրաքվեի տեղամասային հանձնաժողովներ, որոնցից մեկը Երեւանում, իսկ մեկը՝ Շուշիի քրեակատարողական հիմնարկում»:
Սրբուհի Արզումանյանը նկատեց, որ տարիների հետ միջազգային հետաքրքրությունը Արցախի նկատմամբ ավելանում է. «Օրինակ՝ 1991 թվականին անկախության հանրաքվեին մասնակցում էր ընդամենը 40 դիտորդներ: Այսօր Սահմանադրության հանրաքվեին հրավիրված են եւ մասնակցում են 30-ից ավելի երկրների 104 միջազգային դիտորդներ, 103 տեղական դիտորդներ, զանգվածային լրատվամիջոցների 80-ից ավել ներկայացուցիչներ: Այս հանգամանքը մեզ համար ե՛ւ ուրախալի է, ե՛ւ ամենակարեւորը՝ պարտավորեցնող»:
Կարդացեք նաև
Ամի ՉԻՉԱԿՅԱՆ
