Գիտնականները եկել են այն եզրակացության, որ Ջրհոսի համաստեղությունում TRAPPIST-1 աստղն ունի 7 մոլորակից բաղկացած համակարգ՝ Երկրի չափսերով: Այս մասին, ինչպես հաղորդում է ՏԱՍՍ-ը, այսօր տեղի ունեցած մամուլի ասուլիսում հայտարարել է ՆԱՍԱ-ի գիտական տնօրինության ղեկավար Թոմաս Ցուրբուխենը:
Նրա խոսքով՝ այդ 7 մոլորակներից 3-ում պայմանները համապատասխանում են կյանքի գոյատևման համար: «Մենք այս բացահայտմամբ հսկայական քայլ ենք կատարում»,- ասել է Ցուրբուխենը: Նա հավելել է, որ այն կարող է զգալի նշանակություն ունենալ կյանքի համար պիտանի բնակելի միջավայրի հայտնաբերման ուղղությամբ:
Իր հերթին Բելգիայի Լիեժի համալսարանի տեխնոլոգիաների և աստղաֆիզիկայի հետազոտությունների ինստիտուտից Միկաէլ Ժիյոնը, որը պատասխանատու է էկզոմոլորակների հետազոտության համար, պարզաբանել է, որ երեք մոլորակների վրա կարող է գոյություն ունենալ ջուր՝ հեղուկ վիճակով:
Գիտնականները պարզաբանել են, որ TRAPPIST-1-ին ամենամոտ գտնվող 3 մոլորակներում ենթադրաբար շատ շոգ է կյանքի համար, իսկ ամենահեռու մոլորակում՝ չափազանց ցուրտ:
Կարդացեք նաև
Բացահայտումն արվել է Ժիյոնի թիմի կողմից, հենց նա էլ անցյալ տարի առաջին անգամ բացահայտնել էր այդ մոլորակային համակարգը: Բելգիացու գնահատականներով՝ սա կարող է լինել «14 տարվա մեջ ամենամեծ բացահայտումը»:
Ավելի վաղ ենթադրվում էր, որ TRAPPIST-1 աստղի համակարգում գոյություն ունի միայն 3 էկզոմոլորակ:
Անցյալ տարվա հուլիսին Ժյուլիեն դե Վիտը Մասաչուսեթսի տեխնոլոգիական համալսարանից հայտնել էր, որ եթե գիտնականները այդ համակարգի էկզոմոլորակներում հայտնաբերեն հեղուկ ջուր, ապա 10-25 տարի հետո հնարավոր կլինի որոշել երկրային մարմիններում կյանքի առկայությունը:
TRAPPIST-1 կարմիր թզուկը գտնվում է Արեգակից 40 լուսնային տարի հեռավորության վրա:
Պատրաստեց՝ Վիկտորյա ԱՆԴՐԵԱՍՅԱՆԸ
