Կենտրոն եւ Նորք-Մարաշ վարչական շրջանների ընդհանուր իրավասության դատարանը քիչ առաջ հեռացավ խորհրդակցական սենյակ՝ «Սասնա ծռեր» խմբի անդամ Արայիկ Խանդոյանի եղբոր՝ Արարատ Խանդոյանի միջնորդության վերաբերյալ որոշում կայացնելու: Արարատ Խանդոյանն այսօր նախագահող դատավոր Մնացական Մարտիրոսյանին ինքնաբացարկի միջնորդություն ներկայացրեց:
Նման միջնորդություն ներկայացնելու պատճառը մեղադրողի ներկայացրած միջնորդությունը բավարարելու դատարանի որոշումն էր: Դատախազն այսօր միջնորդեց ապացույցների հետազոտության հաջորդականությունը փոփոխել, ըստ որի՝ այս փուլում կհրապարակվեն ու կուսումնասիրվեն տեսանյութերը, որտեղ Արարատ Խանդոյանի մասնակցությունն է երեւում:
Պաշտպանական տակտիկայից ելնելով` պաշտպանական կողմը նախընտրում էր` սկզբում հարցաքննվեն բոլոր տուժողները, հետո տեսանյութերը հրապարակվեն, բայց դատարանը բավարարեց մեղադրողի միջնորդությունը:
Արարատ Խանդոյանը դատարանի որոշումից հետո փորձեց լքել դատական նիստերի դահլիճը, ապա հետո ինքնաբացարկի միջնորդությունը ներկայացրեց, որին միացավ նաեւ պաշտպան` փաստաբան Արա Ղարագյոզյանը: Խանդոյանի միջնորդության վերաբերյալ դատարանը որոշումը կհրապարակի այսօր` կեսօրից հետո:
Կարդացեք նաև
Հիշեցնենք, որ Արարատ Խանդոյանին մեղադրանք է առաջադրվել Քրեական օրենսգրքի 225 հոդվածի 2-րդ մասի հատկանիշներով, այն է՝ զանգվածային անկարգություններին մասնակցելը:
Արփինե ՍԻՄՈՆՅԱՆ
