«Հայելի» մամուլի ակումբում այսօր «Ալյանս» կուսակցության նախագահ, պատգամավոր, «Ծառուկյան դաշինք»-ի ներկայացուցիչ Տիգրան Ուրիխանյանն անդրադարձավ դաշինքի շուրջ հնչող գնահատականներին, թե վերջինիս ցուցակում տեղ են գտել օլիգարխներ՝ նախկին ՀՀԿ-ական Հակոբ Հակոբյանը, Գյումրիի նախկին քաղաքապետ Վարդան Ղուկասյանը: «Իրենք օլիգարխնե՞ր են»,-հարցադրում արեց Ուրիխանյանը:
«Որքանով ինձ հայտնի է որպես բանասերի՝ օլիգարխը պետական կառավարման մեջ տեղ զբաղեցնող եւ այդ դիրքը տնտեսական գործունեության հետ փոխկապակցած անձն է: Այդ մարդիկ այդպիսինը չեն, բայց չեմ էլ պատրաստվում մանրամասնել եւ անդրադառնալ այդ թեմային: Վստահ եմ՝ քաղաքացիների մեծամասնությանը հայտնի է՝ ովքե՞ր են ունակ փոփոխություններ իրականացնելու»,-շարունակեց նա:
Ինչ վերաբերում է «Ծառուկյան» դաշինքի հնարավորություններին, Տիգրան Ուրիխանյանի խոսքով. «Բնականաբար, մենք ձգտում ենք կառավարություն ձեւավորելուն»:
Կարդացեք նաև
Տիգրան Ուրիխանյանը վստահեցրեց, որ դաշինքի նախընտրական ծրագիրը միտված է լինելու ճիշտ կառավարման արդյունքում գազի, էլեկտրաէներգիայի սակագների իջեցմանը, տնտեսության զարգացմանը: «Կենսաթոշակներն ու նպաստներն առնվազն 25 հազար դրամով կբարձրանան»,-հավելեց պատգամավորը:
Լուիզա ՍՈՒՔԻԱՍՅԱՆ
